Oleh : Darwin Nasution
Adong do tong di sada-sada kampung i
manombo alak na ringgas manjalahi
gulaen, dok majolo goarna si Ja Baung.
Hampir tiop arion isompatkon ia mai
manjalahi protein baen di keluarga nia,
manombo manjala, mandurung, mangkail atope
manuba rura.
On potang ni ari sadarion lain do,
manaon kail di pardomuan ni rura Aek Lumpatan
dot aek Batanggadis di julu huta i,
manopi-nopi aek na markarak i. I sapkonma angan-
angan na disi sampe tu na bagas i lubuk na.
I engkol na ma kareta RX 100 taon 1978 i, marngaung
ma songon eor-eor. Karesek na marisi 10 ail tungko
na madung marumpan touk na menek pe mang
gantung di sitang ni kareta on. Sampe i lokasi,
isusukkon mantong tungko ni ail on tar
rangkak, idabuon ma paten bonom ni kail nai.
Pos ma roha ni si Ja Baung nangkan adong umpan on
na isoro ni baung lalu sangkot ma di kail i.
Ancogot nai marngaur muse ma RX on get
manyilo ato mancido ail saro jae,
marpakean dinas ma si Ja Baung,
kaus boksen dot abit karung na marper,
mapondok harani jarangna igosok. Pondok caritona
masuk ma ia tu aek i mangapon-aponi ampot adong
ail on na ona soro. Madung 9 isilo inda dong na
maroban baung. Na pasapulu na, manggurentak
ma baung na sabotohon. Itarik si Ja Baung palan arani
mabiar ia malua. Dung tu darat i raut ia ma dot
andor siang, gogo ikobek na isang nai so so.
Jana ben puasna, igantung kon na ma
i sitang ni kareta on laho mulak
sambil mamiul asok-asok. Pardalanan 1/2 km ngun
panaonan kail an tu bagas na, taru na i papalan
muse doma RX sikukut on, tarsongon na anggar nida
sotik. "Nagodang dai", ning umak-umak na laos tu saba
sambil mekel tu samping. "Olo, baung mantong", ning
si Ja Baung mangalus. Nga sadia onok, "Na godang i Ja Baung"
ning amanta Ja Kareh, sambil martata ipongkik ia baba nia.
"Olo, baung mantong" ning si Ja Baung
muse lamam.
Songoni ma sapanjang dalan, mangkuling
kalak sambil mekel. Sampe tu uta, mandarat ma RX
on manggaruntam di karekel jolo lopo Ja Buyung i. Bulus
marroan ma mangaligi baung, tai serentak mangkardak...
kakakakakakak...na godang dai. Benna madung so i kareta
i, tai inda pe ipamate, mangaligi ma si Ja Baung tu toru laos get turun
...ida ia rupa baung nia na marsisungut na lom-lom do
hape na tibal muse di tengki ni RX i muloi ngon
juluan, ngana marsaraor dalam ia rupana.
Ida alak i mang sodar si Ja Baung...mur magodang kardak ni
alai..."nagodang dai...baung si Ja Baung mantong" ninna doma. I
pamasuk ia mulak gigi ni kareta i mangambur mulak tu bagas, madung
nailaan. Ido rupa na idokon ni alak sapanjang dalan na godang i
sambil tata, mekel. "Nagodang dai, baung mantong". kkakakakaka
kakakakkkkkkkkkkkkkkakakakkkkkkkkkkkakakkakkkkkkkkkkkkkaak
*telah tayang di FB April 2013
0 komentar:
Posting Komentar