Oleh : Darwin Nasution
Nadua parhalan on mada na lokot tu ompung-ompung adaboru di Mandailing. Dua-duana idok kalai marhasaya naparjolo tamba daro, na paduana patogu ato pakuat ipon. Nga dapot jiba sanga adong pe penelitian na marhubungan dohot on, sanga memang makuat do ipon ni ompung i, ato madeges persediaan nidaro nia. Um ngada pas halilian do ruangku, madung biaso jadi nga tagik be anggo nga dong. Pangaligian sakilas boti tar martahan mada ipon ni ompung-ompung on deba harani na marburangir sanga marsugi-sugi, tapi adong-adong juo do na marburangir dot marsugi-sugi on naso adong be iponna. Harani i ahado nadong sabotulna di bagasan ni habiasoan on, boti aha do hasayana.
Burangir ato marburangir singkop adong mentong i ragom nai burangir, soda, gambir dot pining. Umumna nasiak ato na laga mon dot na capot, bahasa ilmiahna ampot mentol dot tannin. Pungsina biasona marhubungan dot mambunu bakteri don, cuma adong ia on marsipat korosip sanga mangikis. Pala pamakean saporluna bisa mei paias baba dot saluran pancernaan. Masuk akal juo mentong pakuat ipon harani iusirna kuman na lokot i ipon. Pala ipangan mabahat tu ra laga on ato sariawan, ibagasan ra juo mambaen menceret. Anggo ompungi tong angke na alakadarna dei songoni i pangan kalai habis mangan, pas ma ira-ira halilian padao muap ni baba. Benna jangka panjang huida ipake alai na mamenek-menek muse do uida iponnalai ibaensa, bope ale mungkin nga gara-gara n ii sude so marnyiang jabat ipon, benna taroban tobang bage do, nga ra berkembang be.
Anggo sugi-sugi i tong timbako asli Simandolam dei. Isolotkon me ii ujung ni bibir i mangintip i balik ni hurum i sotik. Rasona tong paet maia, raso ni timbako. Sabotulna on herbal biaso dope i, harana nga sarupo on dot sigaret idupon. Nga tarjadi jabat pangikatan ni CO dison, ato pambuangan timbus CO2 na marbahaya i. Atope mungkin zat-zat tambahan sampe marribu anggo i sigaret i. Jadi tartolon ompung-ompung i pe so jabat manguaalai ibaen i, hum na capot i raso alai, pakuat ipon patabo mangan ninna muse dope tambana.
Pala madung margabung nadua on jadi habiasoan ni ompung niba, marlom-loman dot marraraan mei pantar dot pamispisan i. Angke manombo, goarna natobang-tobang tele, na asal patibal sanga asal ambungkon dei halai. Rado madais tu abit niba na bontar burangir nai, jadi marbolang iambang kalak naheid iba. Oni sayang muse nida tong abit na bontar marnoda, dompak i kampung najolo dabo ngape na itemuhon pemutih songon sinclin i. Sada hatia ma muap timbako na bucuk saraor niba, tarjuguan muse ale sopa-sopa ni sugi-sugi. Si Taing pe martamba ilala ia asar ibagas dot i alaman harani bokas-bokas ni konsumsi ni ompung nadua i.
Intermezzo do dai sude tele, dao i bagasan roa, mandokdo ibagasan asal ma na lek hiras ompung i. Lek ke tu hata pamangkal nai nangkinani, madung habiasoan dot halilian. Angke iba pe na mandohoti dei manombo tu burangir nai. Rara dabo bibir niba ibaenna songon bibir ni bujing, tai ipon niba manjadi ipon sere. Tagi-tagi sasakali nga jabat lokot i, pala hum margosok gigi iba na luntur mei. Anggo sugi-sugi ba nga ungada i cubo i jabat, nga tahani, onintong na sajia jebu dei nida solot sugi-sugi di bibir niba khas ompung-ompung.Tandang so ipio halak iba ompung sauna. Adong-adong muse dabo bauna tele. Ima so nakaru ilala anggo i umah ompung niba na marsugi-sugi. Madung ale pangumahnai i hurum niba maraek, marcampur timbako dot burangir muse dope tambana. Oinanggg anggo iba sambang...
singkopna
0 komentar:
Posting Komentar