MAGODANG AEK*

 Oleh : Darwin Nasution

Di Mandailing nga ikenal jabat i konsep banjir. Banjir bahasa Malayu dentong naioban ni polisi tu  sadun. Ima so bahasa doli ato bahasa Medan dosdohot bahasa Malayu Indonesia i idokon jadina bahasa polisi. Anggo nga bulek bahasa polisi sude idok bahasa marpasir. Jadi pala manaek hombur ni Batanggadis i dao tu ginjang idok mei na magodang aek. Na sangkalan pala ro godang nai, aha sajo iela ia tarmasuk rambin dot jambatan.

Aha do sobobna so magodang ato mangamuk aliran ni Batanggadis on. Ngana dong jabat sobobna na paling peto i da, harangan nai topi-topi nai markurang. Oni ro muse udan saantero. Artina ro udan i ulu nan Gunung Kulabu, itamba ia sotik godang nai. Lalu tu Muarasipongi ro udan magodang aek Tanjung Ale, ipagodang ia muse deba. Tolap muse misalna tu Muarabotung angke na udan humaliang disi, ilehen aek Botung muse dot Aek Sitaut bagian nia pakombangkon umbahat. Mardalan tu Usortolang na udan do umpamo di Tor Sijanggut an magodang malua tu Batanggadis juo Aek Lilian. Songoni juo anggo na por do udan i Tamiang magodang mei aek Pudung, aek Rao-rao, Aek Lumpatan, Aek Barabolak, aek Kalumpang atope aek Sinapuan. Songoni ma umpamo sampe tu Singkuang an marsilehen, ahantong naso magodang aek.

Di taon 1980-an magodang aek Batanggadis i laoskon na hampir sude rambin tu bariba aek. Dok ma Jambatan Morsip, rambin Patialo, rambin Tadangka, rambin Tamiang atope rambin Hutarimbaru. Na godangan i aek i sakali i, ngun dolok pe maroban tano rura-rura i, pelayangan ma i Aek Nagairan, i julu Botung i jae Tobang adong rura na mencet disi, tapi inda dong gorong-gorong na jadi pala longsor ioban aek langsung tu dalan i.

Godang kerugian ni desa-desa waktu i. Lambat doma so tarbangun pamorentah dot swadaya desa mulak rambin-rambin i. Itamba muse dope le milik propinsi jambatan na malobong, dalan na magotap sanga urak satonga bahat mei lokasi na. Inda dabo sep pambangun nai, marsiakalan sajo tender nai jadi asal baen.

Aso hudok songoni? Biamantong dalan pe asal do songoni tali airna. Na jolo ungada dei i sebar perusahaan Sumber Batu karejo mambaen tembok ni bondar mandang pas sanga tu ise nara doma nida. Naso ungada maniop cendok simin pe mamasang pondok-pondok ira 100 meter soni. Um ngada dung i bayaran borongan nai bahat dei na tungkap pasangan i mulak tu bondar i manyopsopi. Inda i karejo on na ahli. Songoni mei paraktekna urang lobi sampe sadari on, ima so inda ungada marna deges dalan di Mandailing. Maradu godang mambuat ngun tender nai. Pala ro aek sotik ngun ginjang taru itojanna na sampak mei mulak tu dalan i bustak nai.

Magodang aek na bahatan masalah na mandohotina di Mandailing. Harangan, saba, dalan, rambin, jambatan ra majajar ibaen aek i harana nga tartahan urat ni hayu na maotik i be debit nai. Jadima tumpah sude tu Batanggadis. Nga tartampung Batanggadis ilehen muse mulak tu alak, harto, bangunan dot na sing-asing di dalan-dalan nia i. Hati-hati ita pala magodang aek tie.

*telah tayang di FB Feb 2014