RADIO MALESIA

 Bila terdengar suara azan

Bergema sayup menjelang pagi

Dalam irama kukirim pesan

Sebagai tanda aku tlah pergi ...

Na dodasan, ato tola idokon songon na marlangganan doma najolo i tangion lagu-lagu nasongononan lau manopotkon waktu sumbayang ngun Radio Malesia. Radio transistor si opat batu 3 band sogi opat na antik an i nida bontukna. Ngun jolo dei jarum di layar pangaligian ni gelombang nai. Adong muse mei knop on/off sakaligus power pangoluanna. Dung i adong pangatur ni band na MW, SW1, SW2. Biasona Radio Malesia on SW2 dei. Adong muse sada nai tuning pangatur paias sora nai. Pala antong antene doma pangabisanna adong sameter i samping kanan.

Na iasan Radio Malesia on di Mandailing na ingkani. Hum ias dope pado RRI Nusantara 1 Medan, atope RRI Pakanbaru. I samping ni gelombang ni Radio Malesia i mei sotik adong muse gelombang ni BBC London versi Indonesia. Tapi nga dong na paling momo jalakon sian Radio Malesia on. Ima so na bahatan i istilah saborang na binoto ni alak kita saumpamo askar-askar tak berguna (veteran), hentak-hentak bumi (gerak jalan), hospital korban lelaki (rumah sakit bersalin), menteri urusan semak belukar (menteri kehutanan), tahniah (selamat) dst.

Bila petani turun ke sawah

menanam padi tak pernah lelah

hati mengharap tak kunjung sudah

hasilkan padi melimpah ruah

atope

Dialun riak gelombang

dihempas ombak dan badai

laksana gunung tinggi menjulang

hati sedi pedih harapkan sampai ke pantai

ohh ke tepi pantai

Margonti mei lagu-lagu i i putar kalai di jeda-jeda  targan so sumbayang sanga dung abis sumbayang, ambaen na kasidah i dontong genrena, cocok tu waktu-waktu sholat. Dodas juo dei 'Bila Isroil Datang Memanggil' i putar. Padohal lagu-lagu kasidah on da ngana buatan Malesia on, angke album ni El Surayya Medan i jolung kalai. Deba i laguon kalai dot kasidah ni alai.

Marmocom-mocom ma na binege tarmasuk ngun berita ni radio ni alai i. Pala SEA GAMES idok na mei Pesta Sukan Asia Tenggara. Marbal idok bola sepak, terkenal dei i berita pemain nalai Mochtar Dahari dot Au Soh Cin Aun. Dompak adong Mochtar Dahari jarang dei monang PSSI binege najolo berita nai. Pala medali goarna pingat dei jalai ima emas, perak dot gangsa (perunggu). Angkon na ihubung-hubungkon bahasa nai so mangarti iba najolo bahasa Malayu on. Bope soni idominasi alai do pendengaran ni alak satontang berita radio di Mandailing najolo

Imada ira-ira na lokot i pikiran najolo satontang Radio Malesia on. Akhirna azan doma songon kutipan parginjangan i, beda sajom. Pala bahang Malesia ulang be sumbayang ko anggo magrib dot subuh mang abis mei anggo waktu mandailing. Anggo waktu sumabayang na lain mungkin adong dope i bope mang sampe tarkona azan ngun si Mahathir an. Ape ita lanjutkon lagu nai ale ...

Jangan ditanya sebab karena

mengapa aku pergi menghindar

dari kan dekat tapi merana

elok kujauh tinggal mendengar

Biarlah aku pergi dahulu

tidak tertahan lagi derita

semoga yang tinggal senyum selalu

yang pergi ilang lenyap berita

Bila kelak daku terkenang

kutatap bintang di malam kelam

bila tak sanggup daku berenang

kurelakan diri hanyut tenggelam

Nga na sedih-sedih, ampot ben i muse do so sedih-sedihna lagu Mandailing, inda marsemangat, pangaruh ngun saborang ruangku otik bahatna lewat radio najolo.