MANGKUANGI

 MANGKUANGI

Mangaligi alak manual-nual igung anso mandapot kuang, ato korak ni igung sangajo na kotor mada nida tele. Tai ba angkon na alak dei nida mangalakuonna, anggo iba do na manual i nabiaso dei ilala songoni. Manombo asik dope ilala jabat sahinggo tarkoruk sampe tu bagasan an, dapot muse hasil nai di ujung ni jari i. Inda da na get mangecek nakotor-kotor on sabotulna, tai madung manjadi habiasoan naso isodaran don tarlaksana, di suku bangsa aha sajo tarmasuk mandailing, di alaklai jana adaboru, daganak bope na tobang dot sude.

Mocom caro mangkuangi ato mangupil sindok ni alak kota i. Adong antong na sip-sip sado-sado ia songoni di na onjap songon i bilik sanga i bagas ni alai. Pala na iluar ia dompak isampulungi ia dot abit karung nia baruma manual bolut ia di bagasan. Dung dapot non iapuskon ia tu tangga, bangku ato karosi parjuguan nia i. Lopeh mei ilala ia inda sampe tarboto jabat ji alak na mangkuangi ia.
Adong musentong na mangkuangi nga tanggung tidarna, taru i muka umum pe nga mangua. Inda na jabat maila halak na songononan tardapot pe ia cari kuang. Ah biaso dei niroa nia i bagasan, halak madung get muta mungkin mangida kalakuan nia on. Halak naso marmini-mini dei nabiaso nasongononan, oni inda parganjing on ibana.

Na sonting na manual baolut i igung on, adong songon na manjalahi harta karun doma. Iputar jari situmudu i i lubang ni igung iputar songon na mambor domana. Songoni ma ibaen marulang-ulang dung i hasil nai baruma iuncongkon ia sagogo-gogona, sahinggo goyang doma dingding ni alak hona tabrak kuang hasil nai. Anggo nasononan sangajo na semangat on mangela kotoran ni igung i, sampe dosik doma jimprit nai manulbaskonna tu ruar.

Samocom nai, adong na manjalahi korak on dung dapot ipandang jolo sangompot, dung ni baru iputar-putar ibul baru i pistikkon maninjal sanga tujia. Anggo na dompak donok ia tu alak nara dei ona. Tapi untungma ngana borat jabat, anggo sampe markantang jabat binahenna nga hobaran rua muyu i.
Jadi tarsongoni ma romantika ni na manual bolut i igung on, panyarupona sotik nai tambana, satiop mangahsilkon ma koruk an nai, hasil nai tarsongon nai pastion mei kon iligin. Baik ia i tangan bope nai tulbaskon. "Biado godang-godang do bolut nai", ning mamak i sakali tardapot ia si Kamek cari kuang. Ila doma lala si Kamek taru sip doma ia polngit...

@drn2014