tumbuk lanjang sada indaluna
janjinta anggi na sanoli
tumbuk tu alak do laluna
marngaung mada silonging
pala magorit muloi marlaung
adong kampung na laing
ima goarna Tambat Losung
"Songon na mandabu jait tu losung"
Saima jolo pantun dot pepatah nai tele mamak, non pantun pepatah jadina sude goyak muse roa ni parsastra, idok ia na get borongon lahan nia. Na get patuduhon sa dei saotik bahasona memang nadong do botul losung i di kebudayaan ni alak Mandailing. Marhasaya di bahat parhalan dei muloi najolo sampe mungkin tu hapudian ni ari. Maksudna salagi lek adong dudaon panganon di losung ato manduda hasil bumi, pasti mada lek marhasaya losung on. Oni muse antong lek na hayu-hayu dope humaliang ni Mandailing, tontu lek adong dope bahan baku na pala porlu mambaen. Porlu di hangoluan satiop ari, adong bahan giot mambaenna, intong na marjaluk dope goarna, na ira-ira kantang tu manuk dope i, ato holi-holi ma tu sup sanga aek milas tu Indomie.
Na parjolo situtu hasaya ni losung on antong ima pandudaan ni bulung gadung. Peringkat nomor wahid maia, harana inda halak Mandailing goarna anggo nga margule bulung gadung. Bisa do nian i blender ato ituk-tuk i panggilingan, tai marbeso do ninna boto citarasa nai da. Pas manduda bulung gadung on masuk mantong disi dohot rimbang na, kincung (arias) ato honjena marladung manjadi sada. Ampot parpaduan ni bahan na tolu on do masas dot lanom parcampuran nai so patenna dung i santanan. Anggo i belender antong ma lala tu harana benna i aekan jolo targan so i putar. Malala kaluar sude gota nai, ima mungkin so paet pala belender do panduda na. Bahan na lain na dodas iduda sabangso panganon antong ima rabar (rujak Mandailing), tumbang (pisang na mata na madung i bolgang iguloan, ato tola idokon silverqueen Mandailing), manduda topung sipulut baen alame (rosebrand Mandailing), atope manduda ombu-ombu pala get mangarondang. Tar ima ira-ira anggo panganon, anggo manduda eme di losung ma na jarangan mei sannari, ma ipangan masin padi i sude. Pala ipikir sehatan dei gari arana indape kehe vitamin B nai.
Na paduana, maduda hasil bumi nadong di Mandailing utamona kopi. Kopi na tobang atope na madung malamun angkon iduda dopentong jolo boa dua i baru i jombur. So ulang mangkalumpat kopi nai tu tano i, ililit mai ipaginjang baba ni losung i dohot baul-baul. Salose masas ma ira-ira madung bola dua kopi nai ibangkit baru i jombur. Songoni ma iulahan sasalosung sampe salose umpamana sagoni kopi dudaon i. Dung satahap i, salose muse ma na manjombur misalna dua tolu ari, mulak kopi na madung hiang on tu losung pandudaan. On antong mambuat batu ato danon nai doma, lopeh tarduda ipaias i piaran dot induri, anso i gadis tu pasaran markilo. Carana sarupo dot na manduda maek anso ulang mangalumpati lek porlu karung paginjang nai. Adong juo dope nian deba na manyaok kopi on sampe sangek, iduda muse baen sorbuk kopi inum-inum on. Na paten memang, ben sabatna dei karejona, oni benna bahat i sannari kopi instan madung malosok kalak manduda kopi.
Na asing antong kehe tu zaman najolo domon. Ngana adong be tarida manduda singkoru. Dungdo zaman eme di itaan Mandailing, oni ngana aru adong be tolbok haleon, ngana manyuan singkoru be alak. Panjajahan i dei dabo aropku najolo, nga aru adong panganon, sahinggo singkoru nai pardanon i pandudaan i parar pribumi i. Boras doma sude hatia on, ipe naikupas ni masin doma, ngana manduda eme di rondang ni bulan tula be songon jia carito i.
0 komentar:
Posting Komentar