JABAUD

Tartoho ma goar nia songon judul  na di ginjang, Jabaud. Na sangkal mai dongan artina pasangan ni mor madai. Ato halak na marsak sajo nida parmuko nai idok kalak beud, bakud sanga baud. Padohal ngadong sotik pe di parmuko ni Jabaud on da parmarsak anggo najolo, nga binoto ale sannari ampot bahat pikiran nia dung jadi pajabat on. Pajabat juru tulis di lingkungan keresidenan Mandelik na tuari i, dung adong kasus ni kroni nia pindah sip-sip binege tu ibukota provinsi Doli.

Saira-ira taon 83-an markenalan mantong iba dot Jabaud on. Halak na ias don na papi pamake, anak ni toke kantalan ngun DAS ni batangpungkut an. Umak na marjagal abit tu pasar-pasar. Jangkung pamatang na, harani i memang tar sep don pendidikan jasmani di kalas saumpamo volly, betmin, atope pingpong. Tar i maia tong olah raga di SMP 1 Hutanahornop i. Styles dei panampilan nai pala olahraga, bahkan kadang maolah tu ro songon na magaya tu bo kalah. Ma olah tu jadi kalas nami i III-1inda ungada jabat jadi juara di pekan olah raga. Lentak sotik songon na jaim pala i tapuk adaboru, tapi ngana dong sejarahna ba jabat na laku ia di sikola i. Pas partongaan taon 85 tamat ma hami tong, mangalajutkon tu SMA na saborang ni SMP 1 i.

Lek rap dope iba tong na SMA i jadi pilian juo ma ia tong di na marhubungan dot seni muse doma, saumpamo band, tor-tor atope drama. Anggo olah raga madung nga unggulan be harana gok na beteng-beteng ngun SMP na lain. Olo maruba bidang pe bisa juo do Jabaud jadi utusan ni SMA i satontang seni dot band. Adong na lewati guru marga Naibaho pembimbing nalai na marseni on, sakaligus manager nalai niroa pala ke tu keresidenan na asing festival. Tagi muse mantong lala Jabaud dot pak Naibaho on mungkin na mangelola kagiatan on, harana biasona anggo seni na bahatan i ipilian dayang-dayang na deges-deges nai sa SMA jadi anggotana. Kehe dalai i tu Panyambungan bage dompaki harana kacamatan on tuan rumah na, tapi festival on tingkat kabupaten do.

Margeser waktu tamat juo mantong nilai medioker Jabaud. Dibaon postur ni imana tong cukup ukuran do, itarimo ma imana dompak i kuliah di APDN Bandung. Hami tong dot dongan na asing manuju kuliah tu Doli do, adong na di USU, UISU sanga IKIP. Mardalan 4-5 taon markiri tamat be muse ma. Nga onok ngun i marampar muse ma karejo tu Tapiannauli Selatan, balakangan lalu juo tu Mandelik. Tarmasuk ma Jabaud mandarat di keresidenan na baru on.

Ahama mambaen nia marlabuh di keresidenan Mandelik on, rupa kahanggi nia i na jadi Bupati i hatiha i. Monang rupo kahanggi nia i harana Bupati na lolot i madung sapulu taon, inda bisa be dot. Masuk malai tu keresidenan na hancur lebur i tinggalkon Jamarun Daulae. Maninggalkon budaya korupsi, gratifikasi ato sanga aha ma telehe istilahna. Harana jadi PNS sajo pe ninna ibaratna kon manyarat horbo maropat panobusna. Tarsongonima paraktek ni mantan pamorentah di Mandelik na masukan ni Jabaud dot kahanggi nia on.

 Mardalan tardua taon aman-aman dope binege pamorentahan on, Jabaud jurtulna. Tapi pandapot ni alak nabahat nagokan juo do parmainan i toru tangan tarutamo dot cukong-cukong na get mandapot proyek di Mandelik. Tarsongon na painte tarboto sajo doma ninna baen vulgarna deba parmaianan i. Angke mungkin na paulak modal tie, kan ijalakan caro su ipas lunas. Etongan kasarna dabo ninna su jadi bupati na ra dei 5 M tempas. Ambaen i ratona tong kon dapot labi-labi 1 M sataon samaso 5 taon manjabat i, baru mulak pokok ngun, untungna tong ngun gaji dot tunjangan i ma. Taon patoluna adong botul labi-labi nabisa iolah 1 M pas, dapot i lopeh target sataon. Rupona madung muap ma di KPK kegiatan ni alai di Mandelik. Tartangkup basah ma epeng on di bagas ni bupati i di Doli, masuk ia tu krangkeng ni KPK, hona hurung dua taon hurang lobi.

Biama Jabaud jurtul on dung masuk kahanggi nia i. I goyang kalak juo, itamba adong kasus nia di Tapiannauli Selatan na ingkani. I blow up media torus sampe i usut kejaksaan juo jadina. Inda binoto sanga aha na tarjadi tibo-tibo kasus i mago, jabatan jurtul i pe kosong ma, pindah ma ia diam-diam lek PNS tu Doli. Na santing mada i tile, ampot madungmain ningkalak putusna. Anggo Jabaud sampe hatia on tarsalamatkon ia dope iba nia na jadi PNS, kahanggi nai baya ma rondam, nga tarolah sanga bia pe so bebas benna tangkup basah i. Lek idok kalak juo doba naoto alai sarombongan tarmasuk Jabaud, epeng samilyar i tangkup padohal halak na kayo dalai i Doli. Jadi ma ia uruson si Jabaud di prose nai di pengadilan, marsiorgos ripuk mambolo na sala. Ibantong dongan naon sip ma iba songoni, dung jadi pajabat imana, ngana be na tarpangkulingkon, padohal ngana obanon mate jabatan harto dot sinadongan na lain i. Nian ulang Jabaud tarsangkut korupsi, tokinnai ra markamate halak ben

na hurang rondo i dabo roa nia.