B O N

Bus Opelet Nasional ato biaso i papondok BON, on mada motor pangangkutan ngun kampung-kampung di Mandailing Julu najolo. Nga binoto da sanga ngun jia haroroanna, muatanna pe 12 kalak maia so idokon bus, dung i opelet muse dope, skala nasional tai ngana ungada morot ngun kampung-kampung an tu luar. Tako ruai benna lewat i manomno carteran tu parbatasan Sumbar tola mei idokon nasional. Mungkin juo madai nian. BON dei sude judulna parjolo, balakangan baru ma ro muse merekna SINAR REMAJA. Ngana dong jabat parajiananna na tartontu i get mambuat panumpang, na sirapus dei songoni sanga ijia giot nia manaekkon dot manurunkon panumpang. Biama, gorarna pe angkutan pedesaan, manombo pisang do muatanna sanga eme, manombo ale soban bage do pala nga dong sewa.


Angkutan Pedesaan BON on mulai iperkenalkon i Mandailing Julu di akhir ni taon 1970-an, dohot pio-pio an "motor BON, manaek Motor BON" manggontihon pangangkutan natobang naso marmerek targan so i, tapi biasona motorna Datsun pala inda Hiace. Madung matobang tu i mocom ni i, madung martimbus sahinggo jot-jot mogok i pardalanan. Adong mei tong najolo armada nai ngun Muarabotung, atope ngun Tamiang.

Dung pangsiun angkutan na tobang i, ngantong se aru ra alak manaekna be, masukma HIJET 55-WIDE na margoar i dingding nai BON on. Marterminal i lambung tiang mandera i i Kotanopan, adong mon na martrayek tu Tamiang, Hutapungkut, Muarasipongi, atope tu Manambin. Maroban halak na karejo, na sikola, sanga manombo halak na mulak ngun saba. Salose era ni Hijet-55 lebar on ro muse ma Hijet-100 hum ramping sotik. Indabe dung i naro ma songon mangompoti HIJET 1000 jangkung, Suzuki, Daihatsu na tarsarupo godangna, jadi mei marbagi-bagi marmerek BON pala inda SINAR REMAJA. Sopir-sopir na terkenal maso i ima si Kilip ngun Muarasoro, si Uning dot si Aswar ngun Pasar Tamiang, manjiang Bang Ali ngun Muarasiambak.

Tarif santarik anak sikola waktu i ngun SMP/SMA Kotanopan tu Tamiang Rp. 100, alak na dewasa Rp.300. Sarupo juo mei tu Hutapungkut ato tu Manambin Selatan. Pala Kotanopan- Muarasipongi ra mei waktu i ongkosna sampe Rp 800. Pandapotan ni alai na umbahat pala poken i Tamiang ari Sinayan, poken i Muarasipong ari Kamis, atope na paling sep poken i Kotanopan di ari Sabtu. Hum bahat mantong panumpang i sapanjang dalan harana bahat kaporluan nia alak tu poken. Manggadis hasil bumi ato sabalikna marbalanjo kaporluan dapur dot na asing untuk sapoken.

Pala i ligi sannari ngadong peremajaan ni angkutan nai. Jadi hum sep dope najolo bope indape canggih na baru dope sude i itabusi nampunasa nai najolo. Kaluar buka karotas dope ecekna, bope nga sajia onok tahanna harana pala mulak anak sikola over kapasiatas sajo dei muatanna ibagasan sampe tu tarup nai. Normalna 12 sewa ra mnombo sampe 30 alak. Markisar lebaran na lewat tarida ma bahasona nadong dope bokas pangoban-oban niba i sikola na ingkani na maroperasi dope marletek-letek. Inda targonti niroa baen godang ni arga ni motor i zaman on. Daganak-daganak doma supir mangkucakna marasok-asok, anggo si Kilip, si Uning atope si Aswar madung pangsiun malai ngun sitiur i.