PARSIGARET

Umak-umak i pataru na jot-jot manolongi i bagasna markareta tu poken, lau mulak i lehen epeng PARSIGARET. Ayah-ayah pe hama na dodas mangalehen tu na pupu manolongi karejo nia i bagas, pala mangisin ma potang ni ari ilehen PARSIGARET. Sopir ni motor bon atope ALS marsuo dot dongan na na dompak inda dong karejo na ato manganggur irambankon PARSIGARET. Bahat na maroban kenderaan, kareta atope motor, mardame dot polisi idokon mei baen PARSIGARET i polisi i. Songoni museng sopir ni motor barang fuso bope toronton pala main mata kongkalikong dot LLD idokon juo mada PARSIGARET. Parbangunan ato partukang ni bagas manarimo gaji pokenan--pala i Tamiang ilehen ari Minggu potang, incogot nai poken, pala i Panyabungan i lehen gaji nai ari robaa potang pas incogot nai poken juo--ilehen kapala tukang nai sancibit lobi ni epeng gaji i, idokon na mai PARSIGARET. Adong kalak na mambege dongan na laku manggadiskon sanga aha tano atope saba ato bagas inganan, kehe maia mangido epeng sibege-bege baen PARSIGARET. Marsuo dohot sudaro ato dongan na onok, madung inda mangecek anta sadia ni ari, naro ngun pandaraman ipaido ato adong na mangalehen PARSIGARET. PNS manyuruhon bawahan nia manyalosehon karejo nia di kantor ilehen mei epeng tamba, igoar juo mei PARSIGARET. Alat ato tantara na karejo sambilan mangamankon orkes, marvolli sanga marbal, dung salose ilehen panitia mei PARSIGARET na. Adong muse dei antong ruangku kapala sikola na mangalehen PARSIGARET tu guru ato tu murid na manolongi tugas kurikulum nia. Tuan-tuan ato guru mangaji inda na urang bahat be di itaan pala marsuo mulak dot murid na maninggalkon epeng PARSIGARET. Talangke ato agen aha sajo pe di alak kita, lek na idikon nia mei PARSIGARET satiop komisi na i dapot nia ngun nampuna barang, lumayan ma baen PARSIGARET, ningia. Mudah-mudahan ulang sampe mantari, parawat ato doktor marsilehenan di antara ni alai goarna PARSIGARET, padohal na iboto nalai sigaret on na manyegohon tu hahirasan ni jolma, harana na bahatan di na mamboto hahirasan on na mangidup juo. Parlaut sabarang di Siboga ato Natal, pala targadiskon ia gulaen na di dapot ni dongan nia ilen totop goarna PARSIGARET. Halak-halak na patidahon bagas na dijalahan ni koum na ro tu huta i ra juo dei mandapot PARSIGARET. Ra juo doba ruangku nampuna paberik sigaret Comandor i pabagas anak atope boru ato sisolkot nia mahar nai idokon PARSIGARET, qeqeq. Bupati pe ruangku pala mangalehen epeng sotik di staf ahli nia i PARSIGARET dei judul na. Halak na sulang sali tu DPRD an, tarsongon kaki tangan ni dewan na bahatan dei ruangku na hona epeng PARSIGARET. Harana dompak sidang dewan pe na marbual do situtu sigaret. PARSIGARET on madung manyongsong manduruk tujia-jia manombuk sude golongan ni alak na bahat, sampe tu negara dot bangso, mungkin pas mei songon pandokon ni Taufiq Ismail i bahasona ningia antusan ni aha don bo, sangajo songon surgo doma Indonesia nita on di alak na mangidup, bope marliskang doma iklan bahaya ni na mangidup. Santabi da, pala adong na tarsinggung...