Oleh : Darwin Nasution
Nonat di parsiajaran bahasa daerah Mandailing najolo di esempe artina hatia parudan, atope musim udan. On ma naialami ni Indonesia tarutamo bagian barat on sannari bo. Na muloi ma udan sajo. Songon di pandaraman nami di kota hujan on, na mamangkal sajo ma udan ngun on. Pala por ninna ison nangkanna irondamna mei Tangerang dot Jakarta ioban Cisadane dot Ciliwung. Muloi ngun narobi nang adong ma dua batang aek i, dung sannari dope so ribut pala ro udan. Ampot antong benna so dong do nganan ni ni aek i, bo i jalaki ia nganan nia.
Ke ita jolo tu Mandailing tokin, manindo aek Batanggadis. Aekon sannari pala kemarau ama na menek, pala parudan magodang ngana tanggung. Anggo najolo ning Datuk Koring logo sajo pe marbual dome i hasak nai ben godangna. Apalagi ro udan manimbung doma hombur nai. Ima sada partando bahasona madung sega sumber cadangan air nai na bersifat manahan dot paluahon. Mangkurang na manahan aek i jadi malua sajo mangompoti tu Batanggadis an ima so momo banjir momo muse manyintak. Madung sega deba harangan nai sepanjang Daerah Aliran Sungai (DAS) na marsifat manahan dot palua hon nangkinani. Anggo so sala au ungada hudohoti seminar ni kehutanan, satiop meter persegi tutupan ni arangan i ningia manahan sagalon aek ato 159 liter. Jadi anggo nga cukup dope sai ngape i palua ia i, sahinggo pala luas harangan nai sotik doma malua tu luok na hum rondo.
Anggo Cisadane dot Ciliwung na hudok nangkinani na malua tu Tangerang dot Jakarta memang nabolbolan dope i DAS nai, tapi aso nga manahan aek tele. Bol-bol bangunan na ibaen sian beton da marbontuk bagas dot fasilitas na lain, adong bagen villa-villa ni pajabat. Ahantong naso songon naitopohon aek i tu kalian angke manggundul ma sude manjadi dalan dot bangunan. Hum di sekitar Bogor on doma i tahan Gunung Salak dot Gunung Bunder sotik. Pala masuk wilayah Jakarta dot Tangerang na batu doma sude. Nga martahan aek nai tong. Jadi nga sala di Bogor atope Puncak dot Cianjur i, sala di pardalanan i tonga dei targan so tu laut.
Ngadong be parsoan ni aek najolo i, bope ale na marrupo harangan dataran rendah songon rawa dot bakau. Di jaman Ulando nai pajiar dei rawa dot bakau i harana memang marfungsi manahan aek so ulang banjir. Idokon sajo naipaoto-oto Ulando ita, tai ita dope rupa nahum oto. Halai boto alai dope bope na dompak manjajah aha naidok sustainable ecology, lingkungan berkelanjutan anso sampe nyaman nai tu anak cucu. Bo hita mapintar tu, isosotan bangunan i rawa, setu, atope di bakau i ibaen bagas. Boh nga binoto aek udan i tong sanga tujia ia kehe, masuk ia mulak tu bagas-bagas sannari inganan nia najolo i.
Jadi ulang isalaon sajo Bogor, relatif tarbatas dope tutupan harangan na madung gundul i Bogor. Gunung Bunder dot gunung Salak na togar dope isi manahan aek udan i sedemikian rupa so ulang maipas tu sampe tu laut. I pardalanan naon na sega i do porlu i pature so mulak tu aek i nganan nalai i. Memang porlu biaya na godang mada mambaen mulak. Tapi imantong halak kita atope melayu Indonesia on pada umumna dung marmara dei so baru mangubati, inda sonjia so ulang marmara. Na santak mada na manyosal i pudi tele, marcampur bagen nida asing i, na dangol muda naso mamboto, gumarapus soni tingkah laku nai. Mambaen so aman ngun aek udan sajo pe naso salose dope sampe sannari padohal madung i contohon kalai muloi sia taon 1600. Mun ma borat panangungan ni alak sapanjang kali i pala musin nonat madung sampe. Na ra muse dei siklus nai anggo nga akhir Februari nga pe nangkan na so. Sobar komu da di topi aek i, angke mang soni pamorentah tai, inda mamboto na marhasaya. Sobar pabahat on maro muse ale nonat.
telah tayang Jan 14
0 komentar:
Posting Komentar