Oleh : Darwin Nasution
Cakroden..
kuat mangan pining
sabelek saborngin
Imada hata-hata kiasan bahasona memang halak Mandailing i di bahat luok mangan pining muloi najolo. Antong nai parsuani ni ompung-ompung tai dei di gas-gas, di topi saba, di topi ni kobun sampe tu alaman sanga parik ni bagas. Halilian mon di alak kita di na marjuguk-juguk mangecek i, mangido pining di na haroan boru, lau mardalan sanga tujia, atope na tarutamo panganon di abis mangan indahan. Ubat siak ninna gorarna.
Marmocom-mocom ma jenis ni pining on sananida tubu di Mandailing. Sian parbatangna mardanon adong na rondo adong angkon targincat jolo so marbatu. Na rondo dot na taribul-kibul piningna on nabiaso pining kumango don goarna. Na gincat i ngadong gorarna i na khusus, pining biaso ma soni ato pining kampung. Pala mangaligi mocom ni pining ngun warna ni pining nai dung iboa, adong dua pining na bontar dot pining nabara ato narara. Pining na bontar i tarpangan alak na marsiajar mangan pining dei atope daganak, tapi anggo na bara i, markiek dei mangan i, angkon na marpengalaman mangan pining dei so bisa. Biaso juo dei idokon pining na bara on pining na parmabuk. Adong muse jenis ni pining di arangan an ima simarpining-pining na menek-menek son kacang, adong muse na lumobi godang sa panggodang ni kadongdong, pining sundari goarna. Jarang do i pangan kalak na dua on, harana ra oyong ibaenna, angkon na baen ubatma so ipargunahon.
Sindok nangkinan i, halilian dung mangan godang ma hampir pasti ma mangan pining halak di bahat kampung di Mandailing. Apalagi pala joring sanga parira gulena, na dotup dei bulus tu pining i, mangela bau ni jorning sanga parirai ningkalai. Anggo na bontar pining nai taru maturutup dei ona ilkil, harana tabo ato nga mabuk i baenna. Nabara ato narara i di bagasan tarpangan juo dei, tai ulang langsung i sargutan, irondam-rondam dei jolo di baba niba, songon na mangayup bara ato parmabuk nai otik-otik. Dung netral ia baru bisa i ilkil. Ulang icubo i langsung anggo jenis nabara on radei oyong songon gulaen nai tuba. Nian adong juo dei ubat na, ima mangan danon marsanjomput. Logika na da niroa karbohidrat madai mangincop gota tanin ni pining na marmabukkon i.
Tarsoni ma carito tentang pining on da, taringot iba dompak menek najolo mangugus dot manuktuk ulang sampe malala, so tarpangan benna daganak i dope iba. Ning natobang-tobang khasiatna patogu ipon dot pancegah ni disentri ato mancit boltok. Memang di huta-huta na mangan pining na jarangan dei keluhan mancit ipon, songoni juo na mancit boltok. Ampot pining i mei na manjadi hasaya kesehatanna...
0 komentar:
Posting Komentar