Oleh : Darwin Nasution
Sikola on na madung adong ruangku muloi zaman panjajahan. Ayah umak niba tamat SR disi dope najolo. Sikola tingkat SR ato SD don memang di ujung ni tumpuk ni kampung Tamiang naingkani, bope adong dope banjar nia di julu nai Siluak dot Pagaran Dolok i gincatan. Laing sikola julu ato SD I do na mohot di pio-pio an. Adong muse muse memang sikola sada nai di jae, bope inda dijae botul donok tu pasar i, goarna manjadi sikola jae ato SD II. Markisar taon 1979 i bangun ma sikola na baru ngun instruksi ni bapak presiden Harto ningkalai i banjar Siluak. Goarna bonggal sampe ari sadari on totop do SD Inpres maia, inda dong mandok i jabat SD III. SD I on ma na musohurna, bahat halak na beteng haluar sian i, paten-paten ningkalak i guru na pada masa i, nga na dapot jau da anggo sannari ben jatna mutu pendidikan di Indonesian taon parpudion, ampot nadot do guru na mangajar pe na urang pade doma.
Maso iba i masuk taon 1976 sikola on pio-pio informalna totop sikola julu sanga SD I, tai formalna maruba jadi nomor nasional SDN 142658 Tamiang. Ambaenna i bangun i SD Inpres di kampung on son naudok nangkinani, taon 1979 marbagi murid majolo ngun SD 1 sapartolu, ngun SD II sapartolu kalas 1,2,3 i ekspor tu Inpresan. Padohal donokan do tu banjar nami i SD Inpres on, tapi nga ilehen Kapala SD I hami onom kalak ngun Siluak tu SD Inpres i. Bahat juo nai len nian na ilehen ngun banjar nami i, ngantong dapot jiba hatia i sanga aha alasanna. Pot hum bisuk-bisuk dot hum ganteng-ganteng, sayang lehenon iajar Toba i. Toba dontong guruna ro dua parjolo dompak i, ima J&J, si Jabat dot si Juntak.
Ibantong guru niba na laok-laokan i sikola julu. Kalas sada guruna Bu Annah (alm), pas mentong i parmuloan, nasobar mambaen so malo daganak mambasa dot maretong. Kalas dua Bu Oji, na malo marcarito satontang parsiajaran bope agama. Kalas tolu lek Bu Oji mangiut, inda tola satiop murid naso malo mambaen peta marskala. Kalas opat Bu Robiah (alm) malo mangajarkon kesenian, sahinggo sonang laos mulak marlagu sajo. Kalas 5 dot Kalas 6 Bu Masleha na pintaran matematika dot ilmu bumi, jadi cocok ma i baen i kalas na mamarluon marpikir lau manuju tamat atope lau tu SMP. Guru agamana na maloan mangaji dot tajuid ima Bu Asnah. Adong dope i Pak Kaslim dot Pak Amal (alm) nga sompat mangajar jiba benna ipaimbar-imbar sajo kalas mangajar, nga ungada iba hona iajar kalai. Pangabisanna apak kepala domantong, Pak Burhan alak Tadangka, rapi cikek lipung, pintar dot runjang pamatangna. Suman ma nida tong jadi kepala.
Bahat antong prestasi ni SD I dompak iba hundul. Adong waktu i juara catur kecamatan. Adong juara lomba tulis indah kabupaten. Adong juara MTQ SD. Juara marbal kaki ayam sa-Tamiang tingkat SD. Tambana boti tamatan nai dung tu SMP adong dei na juara umum di SMP 1 Kotanopan. Jadi adong ma lobina sian sikola na dua nangkinani na di Tamiang i juo. Sejarah ni sikola dei mungkin deba motivasina, sejarah prestasi.
Ninna dabo ubege alak-alak na manjadi guru na berdedikasi pe di sikola i juo tamatan na parjolo-jolo di zaman Bolanda mangajar juo dei sompat disi najolo. Na binege bonggal tarbarita ima guru Bosur dot guru Gunung. Guru na dua on ma nabahat mancetak alak na pintar tarmasuk guru-guru niba i. Jadi madung musohur ma sikola na tobang on muloi sian narobi, mudah-mudahan nian manjadi sumangot tu mangajar dot marsikola disi sampe sannari lalu tu pudi niari.
*telah tayang di FB Feb 2014
0 komentar:
Posting Komentar