MARASAB*

 

MARASAB

Oleh : Darwin Nasution 

 

Sian hata asab mandapot imbuhan mar, arti kontekstualna mambaen asab ato siksa an tu sesuatu. Aha male na i siksa i. Halak dot batu. Parmainan doon najolo di huta, biasona di huta-huta na donok tu Batanggadis.

 

Alatna majolo na tama dokonon; 1) batu na lipak (batu ceper = flat stone) na pamborat na tartiop dot tartimbungkon iba dope manjadi TUKAK na, ato na torus manorus mangasab batu na ibul ima na idokon; 2) CELEK na, batu na ibul (circle stone), batu na iasab ato itukak torus manorus sahinggo ulang sampe masuk lubang; 3) lubang dot alaman parasapan sebagai lapangan permainan (playing field) batu celek i hajar torus manorus; 4) halak pangasab (asab player), murmabahat mur ma jeges umpamo 5 sanga 6 kalak.

 

Muloina ibaenma lubang inganan ni batu celek na ibul on, posisina agak timbul sotik tu ginjang ni tano parasaban i. Peserta ato halak pangasab manukak tu batu na ibul on, marusaho padonok na tusi, anggo barani mangaluarkonna sian jarak ira-ira 3 meter. Adong akibatna anggo nga kaluar celeknai ngun lubang i, ra dao tukak ngun lubang. Songoni ma marjojor pangasap manukak tu celek i, na bisa mangaluarkon celek ngun lubang mandapot wild card (hautamoan) sebagai pangasab parjolo, mangihut muse na lain ipudi nai sesuai giliran manukak awal manjadi pangasab anggo tarkaluarkon ia juo celek ngun lubang i. atope inda mangkaluarkon celek, mur madonok tukak nia ngun lubang mur majeges.

 

Isema nai asab ato panjago, ima na paling dao tukak na ngun lubang. Ibuat ia mai celek nai anso irambankon atope igulang kon masuk tu lubang nai, iambat ia dot tukak niai i pajong-jong i jolo ni lubang i so dong pantulan ni celek i, so mamomo masuk. Anggo inda pe masuk marjajar torus iasab ipadao celek nai ngun lubang, ra sampe marjom-jom. Naso tahan mental, umpamo daganak na tarhum menek ra tangis ibaen loja na. Mala dung masuk celek i tu lubang ibaen panjago ato na i asab i salose parmainan, i ulakan mulak sonjia parjolo muloina.

 

Adong tambana sotik, tukak nise na manutup i lubang i harani sobob aha sajo di tonga ni parmainan, langsung ma margonti ia jadi panjago, alasanna inda bisa celek masuk lubang anggo na tutup. Ima parmainan marasab ato dodas juo idokon martukak ato marcelek. 

*telah tayang di FB 14/03/2013