MANJAGO ROA NI SIMATOBANG*

 Oleh : Darwin Nasution

Dalam sebuah hadis disebutkan ketika Abi Abdurrahman Abdillah bin Mas'ud bertanya pada Rasulullah : "Ayyul 'amali ahabbu ilallahi ta'ala ?"

(mana-mana amal yang sangat dicintai Allah ta'ala) Menjawab Rasulullah :

"ashsholatu 'ala waktiha wa birrulwalidain wa jihadu fi sabilillah " ( Sholat tepat waktu, berbakti pada orang tua dan jihad fi sabilillah--Mutaffaqun 'alaih)

Sian petikan ni terjemahan hadits nai ginjang i, marbakti ato manjago roa ni simatobang niba isandingkon dohot dua hal nagodang, sumbayang (tiang agama) dohot jihad ( dalan syahid). Ambaen na pontingna madai na patuh tu orang tua ato simatobang on su songoni jabat. Ima so manjadi palajaran na marharga mon jita, na marsimatobang, dalan masuk tu bagasan ni sarugo ni Allah SWT tokinnai di akhirat. Pala taramalkon ngana dong ampunna i be na lempang mei ruangku songon halak parsumbayang na ikhlas dot khusuk atope para syuhada pambolo agama Islam di satiop zaman. Tapi pala iligi akhir zaman on na bahatan na manyalisihi ngun hadits nangkinani parbuatan ni anak manusia on satontang manjago roa ni simatobangna.

Parjolo, asi ita bayangkon dompak menek kita, tarbaru sorang sampe umur lau get sikola. Umur kon nai pature dope dabo on sude hagiotna. Manganna, paridina, manggonti pakeanna, atope na paling paet pature tuaekna. Ikhlas doi botoho satiop orang tua tarutamo umak nita pature i, sahali tonga borngin sajo kajadianna. Bayangkon i paias tonga borngin i juo, sanga songon jia payahna apalagi di kampung tan najolo na martellong-tellong do, ngana masuk dope listrik. Ibasu mei ias ioban tu bondaran ato i siram dot aek pake gayung i toru ni pisang i anggo dao aek na mangalir. Inda hum na sakali dua kali botole alak na mamasa, martaon nai laksanaon ni inantai mancebok kita, namun kadang aha balasanna. Martaon-taon inanta baya mancebok kotoranta, i pangido tolong ibana mandongani ia dompak marnyae taretong ari dua sanga tolu ari maia baya madung bahat kita na marsak tarbayang ini dan itu i luaran an.

Paduana, mare hita cubo mambayangkon sanga songon jia loja sorekna parnapas ni umak tai mangompa hita muloi ngun umur bayi sampe targan su lancar laho. Dung laho pe manombo na mangido iompa juo dope marpupu. Inda ungada binege i orang tua marsak mangompa anakna, sobar, marasok songoni pala na dompak di pardalanan mangompa hita dot roa ni beliau na bontar ate-ate i. I antar ia hita tu jia-jia na sonang hita lala marmayam, manabusi, atope pareso hahirasanta tu pos yandu. So ungada baya marjantok i mangalahoonsa, apalagi mantong umpamo na get marusaho ben jita tu hapea, tu saba sanga manomo na asing, nai parasokkonna dei baya asal lek dapot balanjonta. Tai baya, martaon-taon umak ta na mangompa hita i, manombo baya hum mangido tolong ibana mangantar ia tu saba, tu poken sanga tu mantari an madung bahat di antara ita na muruk, jangan-jangan baya ampot nadong bage do na maila mambonceng tobang-tobang. Gusar ma baya inda ningot be ompaan ni inang najolo i, apalagi majolo ruangku paksa mangompa inang i harani ni nyae ampot ngana dong i be harapan tarjadi ngun anak on.

Patoluna, ita ligi ngun biaya nadung i parkancitkon ni orang tua i baen jita. Panganon, parabiton, pasikolaon, bahkan pabagas kita dot boru ni alak. Ulang be nangkan etong nga nangkan na taretong bei. I parasokkon simatobang tai sampe sikola tenggi bage tu Medan, Jakarta, Padang bahkan sampe tu luar nagori. Inda i pikirkon ia be natusia sanga songon jia panganon, parabiton dot bagas asalma lek sikola danak i. Marabur ilu nia malah pala ngadong epeng kirimonkon ben jita. Marlagut marsak nia tarbayang mabiar nga mangan kita di kota ni alakan. Namun, aha ma pamalos sian kita. Manombo ben kaporluan manolong anggi do sikola, ato ambaen parubat nia, ipangido ia bahat ma baya na mandok inda dong hepeng nia. Nang tarida do di hangoluan nia na marepeng do tangkas. Ato baya dompak marnyae ibana bahat dei na ra mandokon pas iajak manungkirna bahasona inda sompat ia, baenna mabiar do ia kehe muse epeng nia mambayari parubatna. Martaon-taon damang dainangi mambiayai ngolu-ngolu nia, barani ma baya mandok ngadong dompak porlu. Iaminkon malekat ngadong baya, anta na sambang maia manjadi miskin.

Dongan-dongan, bahat dope i anggo i tambahan satontang naso ra manjago roa ni orang tua on. Panulis inda marmaksud mangarengrengna sada par sada, cukup mei na tolu i manjadi renungan di ita. Dalan mandapot ridho ni orang tua ato simatobang on doma hita jalaki so dapot kita jalan tol na tu sarugo i saulakon. Harana pala i ginjang baya sajajar dot sholat rongkon jihad, ridhona muse sajajar dot ridho ni Tuhanta Allah SWT.  Mare manjago roa ni simatobangta, renungkon hadits on

 عن عبد الله بن عمرو قال : قال رسول الله صلى الله عليه و سلم :
 رضا الله في رضا الوالدين و سخط الله في سخط الوالدين

Dari Abdullah bin 'Amr beliau berkata; Rasulullah صلى الله عليه وسلم bersabda; Ridha Allah pada ridha orangtua dan murka Allah pada murka orangtua (H.R.Al-Baihaqy)

Wallohu 'alam

*telah terbit di FB Mei 2014