GULE ROBUNG*

 Oleh : Darwin Nasution

Sakalion catatanna on mangajak lau tu dapur doma jolo. Inda benna idapuran mandera i, ato ma martukar manjadi sibodak bubur ato 47. Inda harani i, tagi-tagi sajo do on, marnostalgia songoni sotik dina marmangan-mangan najolo. Adong mei antong hatiana gakku gule nai gule robung ihan sale. Dosir kinan ijur niba aras, tarbayang siakna. Na lumobi siakna ihan sale ato limbat pala i padomu dot robung. Nga binoto sanga na mangua, tai songoni ma ro rasona muloi najolo.

Robung on tarmasuk mon bahan ni guleon na itandai ni masyarakat di hampir sude na marsetting pedesaan marharangan lingkungan nai. Robung on tunas ni bulu na poso do on. Tai inda sambarang bulu bisa i gule da,tartontu do ima bulu soma, bulu sorik, bulu parupuk sanga bulu tolang. Anggo bulu tumpat sanga bulu surat inda tarpangan i robung nai baen paetna. Robung on nabahatan asom di bagasan ni juhut nai, jadi targan so i gulehon, sapadena angkon i bolgang do jolo satonga masak so mayup macom nai deba. Anggo gulaen nai tong ima limbat atope ihan sale. Rap bisa dei duana, sadantong gulaen rodang nai sale dei ima limbat, anggo ihan sale gulaen air tawar nai sale tarsongon garing, lelan atope abaro.

Pardomuan ni bahan nadua on manjadi mon pangananon na lobi sonting rasona, inda bisa hulukiskon dot hata-hata da sanga songon jia ilala dompak mangan nai. Na tabo, oni nabahat ruangku gizina i. Sapintas antong na awam iba gulaen i di basa di buku mangandung protein mei dot kalsium tele. Pala robung i benna marhapur i do nida pangkalna, oni macom-macom daina lapatan ni alak kita mangandung zat kapur ato fosfor dot vitamin c sasuadana. Dung masak anggo etong kalori ning par ahli kesehatan in a bahat ruangku i.

Kalori na mardomu ngun robung dot gulaen on ramon manjadi pangkal ni gogo di pamatang ni alak di Mandailing. Marbagi mei manfaat nai ipangalo ni panyakit pala magugang, manggonti sel na sega, manolong topak ni enzim dot hormon di boltok, atope so cirlak sisilon dot obuk. Bahatma boti hasayana tu pamatang harana itamba muse cara marmasak ni alak di mandailing inda manandai penyedap ato patabohon songon vetsin sanga ajinamoto. Madung deges dot gurih mantong bahan nai, pandangan ni alak kita i vetsinan muse dope, na oto marmasak doma i putona. Alami do i sadun paling sira dot asom maia patabona manggonopi bumbu na bahat.

Komplet doma, madung bahanna na deges, cara marmasakna pe alami. Marsigor doma kuah nai itatap ngun na dao. Pala i muloi si lian dot si taing manganna, ra martambu ciek kalai tai marnoli-noli sampe dua tolu noli. Pala na madung maringanan ra juo mon mamolus nantulang nia inda boto ia baen canduna na mangani. Candu martambu-tambu juo..ha ha ha

*telah tayang di FB Feb 2014