POKEN SINAYAN*

 Oleh : Darwin Nasution

Dompak di kampung iba antong najolo, songoni do manoho poken di humaliang ni kampung niba. Poken Sinayan mandok poken Tamiang. Pala poken Salasa langsung mei binoto pamikir niba poken Pakantan; pala poken Rabu ima di Laru; poken Kamis di Muarasipongi ato Morsip; poken Jumahat poken jong-jong di Muarabotung; poken Sabtu ima poken Kotanopan. Anggo na dao-dao songon Sinayan i Maga, Salasa i Kayulaut, ato Kamis di Panyabungan ngana searu binoto i najolo. Na paling lungun ilala painte on ngadong na asing i lain poken Sinayan i Tamiang. Alak i ibantong. Pala ningot sannari bahat ma silungunonkon pala ke tu poken. Tarutamo anggo iba alaklai da markisar tu panganon don, na khas poken Tamiang, alami, sehat, inda pake vetsin atope pengawet. Aha sajo mei, ikuti terus tulisan on so boto dongan-dongan. 

Parjolo ligion antong pocal ni inangtobang Etek i jae balerong. Lengkap mantong sayur na i pocal on, bulunggadung, kacang panjang, gasing, dohot botik naposo nai paruk. Madung ikukus mei andostorang i nabiaso so ioban tu poken, pas ipaido na tinggal padomuna domei i tapak pala na get i pangan isi. I siram inangtobang on mei dot kuah kacang na siak-siak ancim i. Anggo get obanon i tungkus dot bulung pisang. Au tong isi do upangan, utambai mei dot goreng ni inanta na sangek ubuat ngun parjagalan nai tardidolok, pas i topi ni teras SD 2 Tamiang na marbatasan dot poken i. Ialngean ma palan-palan, i nikmatan mantong, ben tabona lewat pe manombo si Culan i jolo parjagalan ni inanta on ngana uboto i be. Salose mangan pocal on, itutup mei minum tes na capot biasona cop mandera dei tes nai. Marongok mei jolo santongkin lau mangecek-ecek rap dot inangtobang on. Tar martonga ma non sotik boltok i ipaido muse mei na asing.

Tirip padua hon mangido lontong muse mei sakadak. Lontong na pir-pir dayuk ibaen ngun danon ni eme si kodok niroa, ikuah dot gule sobodak na kodoh ato liut doma. Sabotulna nai i maia ramuanna, pas manggule nai dei ruangku lengkap bumbuna sahinggo uskus muap parmasak. Itamba biaso di itaan anggo manggule sibodak ibaen dei karupuk jangek tu bagasan so muap daging. Ima naisiramkon tu lontong nangkinan itambaan dot lasiak goreng sacukupna, margoyang-goyang soni dila niba, tabo padohal na sederhana do resep na. Pala nida di tivi ato di koran, na mocom mada nida bahan nai, pala i cubo ma i kotaan ngana cocok dot dila niba. Anggo lontong di itaani get martambu ciek dei gari ilala pas i poken i, tai ngara be mang sanlampis antong nangkin pocal. Dung minum, na lain muse dome i i jalahan, tarsongon na manjadi ubat siak doma kajakna.

Tiboma di na manutup marjajo marabur i poken sinayan on bo. Kehe ma tu parjagalan ni inanta na sa rap dot inangtobang na godangna ima inangtobang Amdak. Isi adong mei kue-kue umpamo lopek inti, gadung inti, kue mangkuk atope kue cucur, itamba dot goreng pisang. I cuboan mei soni sada-sada marasok, harana palat padua lontong nangkinan pe na lau turun dope ilala. Dung tarpangan naron sude mocom nai na maragak mulak muse domei iba. Isapaan mei sanga madung siap balajoan ni inanta, harana tartongkinnai ira-ira jam 11 na muloi mei markobas tutup poken.

Adong ma obanon niba mulak markareta angin balanjoan di hadangan. Pala iligi isina na kaporluan baen sapoken dei sude, makasudna kon cukup sampe tu ari Sinayan naro. Adong i bagasan sabun maridi, sabun talipon panyabun, ubat ni ipon delident, asang muring, kantang, lasiak, bawang, maco, harasak, baledang, ihan dot harambir. Adong manombo i bagasan pocal, mie, dot kue-kue baen silua di anggi sanga angkang niba naso ke tu poken. Boti adong khusus ari sinayan i gulaen laut na maek ato manuk na madung i sale baen gule on sadari i, tandona na poken sinayan. Tarsoni mada halungunan i tu poken sinayan halungunan na sederhana, lek adong dope sampe sannari margonti generasi, anggo parjagal ni barisan ni inanta on madung pangsiun mei sude. Ro naposo, tapi raso ni panganon khas poken sinayan i lek soni. Nga tardok be jolo, harana nai pandaraman do iba sannari, i sumankon doma songoni na i itaan, mangan pocal ni alak sunda on boh...

*telah tayang di FB Jan 2014