Oleh : Darwin Nasution
"Aso tangis ko Kamek?", ni sapai amanta na di alai i Jamuldus pas mulak si Kamek tu bagas.
"I osom kalai sajo au ayah marbal locing", ningia lek mingis-ingis
Adong mei mungkin songoni hata mangadu ni daganak najolo pala hona osom marbal loncing. Memang khasanah kebudayaan Mandailing juo do on, apalagi di huta-huta nadong alaman bolakna, atope adong lapangan olah raga di tonga kampungna songon parvolly-an atope parbetminan. Pala ngadong dompak na main, i pargunahon daganak-daganak alaklai mei sangompot marbal loncing. Parmainan ni alaklai do on, cuma antong pala lek adong juo campurna "jantan" nga mangua lek i padot juo dei biasona.
Parkuas na porlu baen tu parmainan on antong na parjolo ima bal loncing, bal palastik na nayang, pas tarsagodang ni bal tendis. Bahat dei marjagal i pasaran, napaling topot adong sajo di parjagalan ni ompung Pangiutan i. Na paduana naporlu ima pangaloncing nai baen tarsaginjang ni tangan ngun bulu sanga hayu. Panggodangna inda se aru, sa honakna mangaloncing bal na menek mantong, ira-ira sainduk pat atope menek sainduk tangan. Na patoluna na paling ponting ima tukang loncing, halak na marmainkonna. Nga jadi i ba anggo nasodong do halak na. Degesan marbahat-bahat so momo margonti "huting" ato na manopo so hona alak na asing, so ia huting. Pala otik alakna murmasusah arana bolak pangilakanna di lapangan na madung i tontuon i batasna, ima misalna salapangan volly.
Marmuloina mangundi mantong dot "bahat sampe cus". Pala bahat antong mangadu talapak tangan saguman nadot di tonga manyaring, adong na buka tangan, adong natutup sacaro reflek. Na otikna mandapot lulus inda huting. Dung tinggal dua nai cus domana manggunahon jari sanga ise monang. Na talu ima na manjadi huting i. I loncingma bal naon tu naso huting anso i oper ia tu dongan na asing. Na huting mangkojar torus marusaho mambuat bal on so tartopohon ia tu dongan, oni hona badan nai sanga jia nai sajo pe, tangan, indora, atope obuk misalna. Margonti ma huting dung soni.
Jadi son nai dokon di ginjang mula bahat halak na copat tarkojar bal nai so dapot, oni hum momo manopo halak. Anggo hum tolu sanga opat kalak do iba, ro ma songon parmainan tendis, ngun baseline tu baseline, ato ngun ujung-ujung ma iloncing dongan bal nai, na huting marlojong-lojong ujung tu ujung juo mangkojarna so bisa manopo. On ma kadang naso dapot i sampe marjom-jom, hona lenglong ato hona osom torus. Ambaenna madung songoni ma la a ibaen kalai si Kamek, madung na loja an so mulak boti doma ia mangadu suak baba i tangis tu amang nia, idokon ia na iosom ni alai ia marbal loncing. Sobarko Kamek, ibalos Tuhan dei saulakon ...
0 komentar:
Posting Komentar