HONA RAZIA*

 Oleh : Darwin Nasution

Alkisah adong mada sada rumah tangga na urang mampu di kampung nai bariba, anakna sampe 6 jabat di bagas i. Alaklai nai margoar si Kamek adaboru nai margorar si Lanniari. Si Kamek on inda nadong karejo nia na totop ngadong gurison atope saba nia, oni si Lanniari pe ngadong keterampilan nia tasongon na bisa manolongi ekonomi ni keluarga on. Ha onom anak ni alai i na menek-menek-menek an dope, ben ramos dot hobor na do dabo si Lanniari, dua sorang satiop tolu taon, jadi na tarsapulu taon dope alai na rap i. Nagodang nai marumur 10 taon, na menek nai sataon dope. Mangan ari-ari pe na dodas dei alai i tolongi hombar-banjar i. "Paet ni na mangolu", ning si Kamek dei manombo asok inda i sodari ia.

Di sada ari dompak manghayal, dung mulak ngun kobun an mangarabi, marpikir mada si Kamek sanga songon jia so adong sajo boras i bagas. Ompot-ompot ro ma i bagasan ni akal nia mangirim surat tu ustad na kayoan nai i tivi i na suka manolong kalak i, jungada ida ia pas manonton tivi i bagas ni alak si Kapeh an. Langsung ma ibuat ia karotas buku ni anak nia nagodang nai, manulis surat tu ustad on.

Ustad Na denggan roa,

Tolong ustad kirimkon jami epeng baen panobusi ni

danon mangan ni keluarga, na jot-jot dei hami inda

mangan manombo sasadari. Ustad lehen ma jami 100 ribu

pe dabo, baen parsadioan ni danon pe mar 3 suat, balanjo sapoken.

Jagit holong ustad

Kamek

Dung i baru i sibakkon ia muse dua lambar ngun tonga buku 12 lambar ni anak nia i, i baenna jadi ampolop ni surat on. I lem ia ma dot indahan so manjadi ampolop tarsongon aer mail i, i tulis na muse ma alamat nai tuju ni surat on.

Tu bagas ni ustad na denggan roa
Sanga ijia sajo pe bagas na

di ampolop balik nai i tulis na muse,

Pangirim

Kamek

Kampung Mambarbari

Kelurahan Tarutung

Kec. Loncat

Dung salose mangisin ma ia tu adaboru nia i get manaruhon surat on tu kantor pos. Nga dope lalu tu kota Panyambungan goarna, adong mada ida ia kotak pandabuan ni surat di Air Besar goar ni luok nai. I pamasuk ia ma surat nia tu kotak on.

Lek naro mentong tiop ari par pos i mambuka kotak on, ampot adong na opamasuk surat baen kirim on tusi. Tarsonggot par pos on adong surat ampolopna ngun karotas buku, lemna indahan marsalutap, inda maralamat tujuan na inda jelas muse, adong pe suada parangko na. I bacana tongkin, mubit baba i mandok 'na rintik", baru iambungkonna surat i tu dalan i.

Adong rupa dua halak polisi marbonceng, dompak patroli manyogot manggas asok-asok di sekitar ni Air Besar on, bo tarida ji alai surat na i rambankon ni par kantor pos on. Pas ibaca alai nadua ampolop nai mikim kalai, son na panasaran ibuka halai surat on, sambil ibaca sanga aha isi na. Dung salose, ibo roa ni alai adong dope halak na martangkol mangan di banua on. "Adong ison epengku 50 ribu", ning polisi na sada, asi ita tolong. "Au 25 ribu nai doma epengku", ning polisi na sada nai.  I pamasuk kalai tu ampolop nai epeng na 75 ribu i, baru ilemkon kalai mulak palan. Baru i gas kalai honda dinas nalai i tu kampung bariba, ngana tanggung honok na so marsuo bagas si Kamek on. Dung marsuo isorahkon kalai langsung surat on, nga sajia onok na torus mulak malai, arana tugas dope tong.

Sapaninggal ni pak polisi i, ibuka si Kamek ma ampolop on mulak, na sonang mada roa nia adong i bagasan epeng 75 ribu. Tarsongon syukur nia, i tulis na muse ma surat kirimonkon nangkan na

Tu ustad na denggan roa,

Jagit holong mada mang hutarimo tolongan ni ustad i,

tai ustad, sakali nai ulang i tongoskon tu polisi, mabiar au ampot nai rahazia ni alai do harana kiriman nai nai hurang 25 ribu ngun na hupaido i.

Jagit holong

Kamek

*telah tayang di FB Des 2013