Di na taon piga mai ruai tie, maso i SMP lau tu SMA iba gakku. markisar 1985-1986 ma ira-irana, adong serangan ni panyakit ni pote ima hutu lumpat. Terjemahan bebas don kahanggi atope mora niba, bahasa polisina kutu loncat do, hama ato panyakit na palipung daun ni pote. Oni na merata dei di saantero wilayah ni Malayu Indonesia on. Aha do ale dongan muasal ni on ?
Mamang na ngun Cendana Parasiden na padua nai don dabo sobobna. Adong ma isuankon hatia i lamtoro gung ijia-jia parkobunan ni anak nia i di Indonesia on, rupa ngana pe iteliti hama na. Angke so rato hona, kobun ni si Sigit, si Bambang, Si Tutut atope si Tomik anak ni Mamang i madung songon tangan ni gurita doma bisnis pertanian ni alai i satiop pulo nagodang di nagori on. Parjolona makasudna suan-suanan pangalaungi don targan so jadi umpamo kobun coklat, kalapa sawit atope koje na imbaru isuanan ato ibukak. Be rupo na mangandung hama ato panyakit na agresif do mangalumpat-lumpat songon gorar nai tujia-jia, marratus kilo meter estafet, sampe juo mada tu Mandailing.
Aso do ra sampe baya tu Mandailing? Lamtoro on antong mocom ni pote cino unggul do on, hum godang-godang batang nia, ipas tubu maincat dot batu nai bisa i pargunahon petani. Na tarsarupo dontong dai ni bulung nai, bope ngadong ilala kobun na manyuan lamtoro donok i Mandailing, rupa benna estafet i ngun kobun-kobun di kabupaten tetangga. Ngana hum kobun ni anak ni si Mamang jadina na manyuan, kobun na asing pe na gok do maniru. Biama perintah ni parasiden. Inda na sajia honok dung adong berita i radio na marmasalah lamtoro gung on hama hutu lumpat, tu kampung pe na tolap ma.
Songon jia langa jabat? Ulak be dok sanga songon jia. Anggo ida dongan na mamasa alak na ulu bukur pas ma songoni. Inda dong tinggal daun ni pote i. Habis lipung, pul-pul, nga sajia onok masak ma batang nai, nga tarjadi be niroa fotosintesa, matema batang nai, inna lillahi pote i. Songoni ma rato pala ipandang i topi-topi dalan i di Mandailing. Mantak majolo manggule pote na tobang, maradian marngat-ngat pote naposo. Balakangan kubege sompat do ikirim mamang i tim tu Hawai sangan songon jia mangatasi panyakit on. Dapot do nian sabangso parasitna na mangan hutu on. Tapi kan hum di parkobunan an ma na tarpasang, padohal akibatna madung sampe tu pote tradisional di huta-huta.
Ima adilna Tuhan tai. Satiop bencana adong dei finisna. Nga na iubatan jabat pote i martunas do deba mulak balakangan. Ampot dabo mate sandirina do hama on dung ngadong be panganon nia. Angke anggo pote tradisional antong ngana jabat sajia i, hum na tubu alami maia i manopi-nopi Batanggadis. Inda ale jabatna isuan besar-besaran jadi pagar hidup ni marhektar-hektar kobun nalai na markuaso i. Tubu do mulak pote di Mandailing sampe sannari, mulak jadi markuah rara pote natobang ato naposo i arambiran pangaroncana maco nagodang, marsigor songon gule horja. Ninna pe antong gule horja sibodak ato pisang i poten dei so mantap tampilan ni sigor nai. Tamat juo kisah ni hutu lumpat i sampe sannari, Mamang i pe tamat juo dung mambaen susah di alak.
0 komentar:
Posting Komentar