PATAMA-TAMA ON SONGON SINAPANG NA SEGO*

 

PATAMA-TAMA ON SONGON SINAPANG NA SEGO

Oleh : Darwin Nasution

Dongan, unjung domu martamu tu bagas ni alak nadong ruang tamuna? Ngun na sadia bahat diroroan, mungkin adong pajumpang di ruang tamu nai dipajang, dilokotkon di dinding i sinapang na sego.

Aha mantong lapatanna deges pe nida anggo naso marfungsi do. Artina naso bisa be manembak sesuatu. Naso bisa be mangaruarkon masiu dot pelor ngun laras nai tu sasaran nai tuju.

Harani sada dot banyak hal madung sego do sinapang on. Tapi sentimentil dot nostalgia ni nampuna sai itempatkon ia ma sinapang on di tempat na terhormat. Lokot di dinding i ditempat naincat muse, di na tama ma ecekna. Padahal hakikina ngana ngana dong gunana be rongsok doma.

Di hangoluan on pe ra dei dongan-dongan adong nai patama-tama tai ngana marfungsi. Adong nai patama-tama paminpin, tai taru so malo maminpin. Adong naipatama-tama jadi ustadz, imom, guru tai na otikan do isina, atope donok tu na lambang do. Juo bisa ipatama-tama bapak ngana pas, ngana bisa mangalen nafkah ni keluarga, adaborui do na markaya, nai dapiran do mandera i. Lek nidokkon ia, ia do raja di bagas, ipatamana pemimpin na adil di rumah tangga padohal gabus.

Jadi apa adanya ita soni, alami, kodrati, qona'ah, thobi'i, sesuai kenyataan, inda dong nai paksaon, nai patama-tama songon sinapang na sego.

Magalombang 10/04/23

*Telah tayang di FB 10/04/2023