Oleh : Darwin Nasution
"Molo sala di pandasoran, sega mei i pambibiran"
Sian pangibaratan nai sajo madung adong don da na mamboto sanga aha maksud ni on. Adong na mandasor, ato mamuloi patron sian na paling parjolo situtu. Adong na maotik tu, adong mungkin na ma bahat tu bahan nai. Bahan na bayuon biaso, bayuon simarbulu-bulu atope bayun sian pandan na madung iela durina. Margoar bahanna bayuon markasimpulan mamunpun ma bahasona carito on satontang mambayu. Karejo ni adaboru na madung dewasa, ato umak-umak, ompung-ompung atope bujing-bujing zaman najolo di Mandailing.
Songon naidok nagkinani bahanna nabiaso adong tolu mocom na musohur ima bayuon biaso na marwarna na rata, bayuon simarbulu-bulu nagorcing dohot bayuon pandan nabiaso hasilna hum bontar. Dodasna i pahiang dei jolo i las niari baru i bayu kaum hawa on mangisi waktu luang ni alai. Adong nai baen amparan, baul-baul, goni, atope hadangan. Na mamben hadangan on ma ma payahna, kon pas pandasoran nai, kon pas juo tarik nai lao tu ginjang tu baba nai atope tu pambibiran nai. Tardok mei na madung malo situtu adaboru i mambayu pala madung lulus mambaen hadangan marbontuk targodang i toru, mamenek marasok lau tu pangujung pambibiran nangkinani.
Pala halak na marsiajar mambaen hadangan sering ma tarjadi na sala dasor on. Ma bahat tu ningroa bilangan ni bayuon parmuloi nai. Jadi mur maonok mur madao i jalin ro ma mabolak tu pangolbungan ni hadangan on. Torus maragak tu gincat mur so tarbaen bontuk nai mamanek tu pambibiran an. Ro ma bolak, holbung, oni pondok inda rip-rip marbontuk lau tu ginjang songon pambaen ni na papi. Pala ro songon i ima nai dok na katabak. Inda markatontuan sampe manjadima naidok nangkinani bolak, holbung, dot pondok. Ibarat ni alak mok-mok, bolak, dot pondok. Nakaru madai tile, sega na denggan.
Jadi kon marsiajar mangulaki marpupu ma halak na madung sala mambaen hadangan on, sampe malo. Anggo na katabak do memang na payahan i sandangon pe inda tagi, inda lanom ilala di pinggang i dabu na. I ajari natobang-tobang nai mei sanga ijia masalah na so nga denggan finish nai. Lek tu naidok nangkinani juo dei malua na sala di pandasoran, baik ningia jumlah ni bayuon nai, bope tarik ni anyaman nai. Anggo pas patron ni pandasoran i, oni sep tarik ni parsosot ni silang-silang nai, insya Allah ninna paten dei sampe tu pambibiran.
Papatah on marmakna juo don tu na mangasuh daganak. Ulang sampe sala mandasor kalai dot ilmu na pade dunia akhiratna so ulang sala di usia dewasana, atope di ending nai. Angkon nai bekalan do halai dot ilmu na pade sedini mungkin baen bohal ni alai mangolu di usia dewasa bahkan usia tua ato ending ni mangolu, ibarat ni pambibiran nangkinani. Malo-malo hita nian orang tua na on so marhasil anaktai sampe matena, ulang inda markatontuan hasilna songon hadangan na katabak.
0 komentar:
Posting Komentar