IKOYOK MANUK I*

 IKOYOK MANUK I

Oleh : Darwin Nasution

Lek na huingot mei najolo mantari nai lambung sikola julu i, ro ia mangubati bujing-bujing na mancit ipon tu Siluak. Bagasna i donok baraan i dolok. Dung proses mangubati beres, marsapa umak ni bujingon sangan aha ilen panganon isia so ipas murak. Ahama ning mantari alus na "Ikoyok manuk i".

Songoni juo pala adong na marun marlolot-lolot, padahal nang paet ma ilala pasien sekian lama ijuri, anggo isapaan pantang na marpupu dei kaluar binege ngun mantari i. Tapi anggo so copat malum lek i dei "Ikoyok manuk i"

Mimbar kita tu hal kawin-mawin ato nikah. Pala adong na dompak di abara panjujungan, tapi ikkon marripe juo ijalahan doma na sederhana na momo nai. Nga tartuor hambeng baen horja arian, boh ibaen karejo borngin, iontang soni hombar ni bagas i di akad nai, lau muse "Ikoyok manuk i"

Gumorcing mantong eme, etong ari pe anta na manyabi ma. Saro jolo iontang dongan lau i cas dot kuah rara. Jia ma nai baen kuah rara i? Anggo tartobusan tong bante ari kamis tu kotanopan sep, mur marara ia. Tapi anggo nga bisa, iurka ngun lobu, lau ilen piso tu talonan nai "Ikoyok manuk i"

Manombo ro tamu istimewa, sudaro na mang lolot nga marsuo, ato dongan sa parjuangan di pandaraman jumbol di alang ulu ni bagas niba. Manombo ngana dong gule tobusan, ato nadong di bagas madung habis i pangan harana madung lewat hatia mangan. Jia doma binaen manyervis tamuon, biasona nga tujia i be "Ikoyok manuk i "

Jadi manuk on nutrisi ponting don di budaya mandailing. Dibudidayahon secara merata di rumah tangga-rumah tangga, cadangan makanan untuk waktu-waktu tertentu yg istimewa. Kuah rara jot-jot idok hasil kuliner bersantan, sebagian berasal na ngun lemak ni na "Ikoyok manuk i"

Bogor 14/08/20

*telah tayang di FB