IKAN BELEK (Nostalgia Mardahan Mangan)*

 

IKAN BELEK

(nostalgia mardahan mangan)

Oleh : Darwin Nasution

Na mocoman on julukan ni ikan belek on. Saro Indonesia na ikan kaleng. Deba mandok sardines ato dencis. Na santingna adong dope mandokna i uta gulaen nai durumkon. Durum dongan, sajia godang dei baya tamsil nai, gulaen paus doma dai isina.

Gulaen nai bagasan ni wadah on asalna ngun Bahasa Belanda, blikjes. Maruba manjadi blik, marujung didokon halak kita belek. Ngun jaman Belanda mang adong ma berarti ikan kaleng ato ikan belek on.

Marcarito hasaya ni gulaen nai durumkon on, taringot mada on na masa-masa i. Argana tarjangko, tartabusi ato tartuoran, nadodasan on jadi gule pala kehe mardahan mangan. Marmangan-mangan tu sopo saba, kobun, topi aek atope topi ni rura. Imasak santan icampur dot kantang atope pusuk-pusuk bulung gadung nai repus.

Taringot di merek adong mei najolo bacaan na di kaleng nai Botan, on nataboan ihanna. Kawe nomor duana ima Kiku sanga Atan. Balakangan dope so ro Gaga dot ABC.

Kamben marmangan-mangan on uingot mei bo si Ican, Arif, si Adek atope si Kulim, supir raun ni Tor Sijanggut i. Idok kalai sajo mei na um tabo masakan ku benna malosok dalai pamasakna. Jadi hampir na iba do pamasak tunjaton nalai pala mardahan mangan.

Napatenan memang bope on maia gulena. I pamasak indahanna opat takar pala lima iba. Dung salose mangan pir domei boltok i, manarik ulit nai songon gondang. Tarkorak indahan, tungkis ikan belek, sampe adong doma na mangapuskon tu huali nai. Sangajontong na sabas, inda binoto be sanga mandok si piga puntenna, baen tabona.

Ah sep doma masa-masa i arass

Bogor 20/07/21

*telah tayang di FB 20/07/2021