DAPOT KAREJO DI PANDARAMAN*

 

DAPOT KAREJO DI PANDARAMAN

Oleh : Darwin Nasution

Nga dope tarpiga poken si Batu di Poken Baru, adong ma pardonganon ni uda nia na pasuo di pasar. Atehe waktu i dompak marmayam kalai tu Poken Baru akhir bulan. Uda ni si Batu antong mambuka kode kalontong tar di topi ni kota i, di na tarrami, jadi ra boti pasuo dot alak na bahat, ato mungkin juo alak kita. "O Jaborkat, adong do karejo di ho an", sapa ma uda si Barlang na margoar si Jabingkas tu bayo alak kita i. "Adong angkang, dompak mambuka areal na baru tu parbatasan ni Sosa an, di SRR goarna", ning si Jaborkat on. Jia ma SRR on maksudna Sungai Rokan Riau, lokasi perkebunan havea dot sawit. I laoskon Jaborkat mantong si Batu tu sadun.

 

Sampe di lokasi, botul mada parkobunan, sabangso karejo na mangaluarkon gogo do sude. Tapi masuk pe tu karejo na hum alus dabo ecekna tarsusah do diraso si Batu harana besluit nia pentong SR do. Pohom maia songoni disi, mang son na dewasa pamikir i, aha ma soni pado-pado i kampung hona tudu sajo iba manangko manuk, mutik, apundung atope nam-nam niroana. Dapot ma divisi nia di bagian penggalian parit di topi-topi ni tiop dalan-dalan na binuat di parkobunan i. Sulang sae suada mara tahan do ia tong, matogos magodang badan i bope mangompaskon gogo karejo i.

 Madung lupa do sahonok naon ia tu uta, pas sada potang adong dongan nia na diharoroi ni simatobang na tu parkobunan i, taringot mada ia tu ayah umak nia. Dung i pasapa ia rupa donok do ngun Simamonen kampung si Batu huta ni amanta on. Mambaen surat doma jolo, ning roana mangompoti, harna tartolu ari do ninna ayah ni si Telegu disi, dongan nia na haroan simatobang on.

 Tar dihatia get mulak ma amanta si Telegu on, i tongos si Batu ma surat on, hum surat maia, harana gaji nia hum pas mangan dope rupana, bahkan kadang marutang dope sotik.

 Pondok carito, sampe ma surat on tu tangan ni ayah si Batu, amanta i si Balak. Dung i buka ibaco ma, tar songoni mantong isi ni surat ni alak kita....tuadopan nia ayah/umak di bagas on...........assalamu'alaikum...."anso hubaen peda ayah/umak surat on, ngana bage aha dot bahat jabat hatana, mandoksa do bahasona au di bagasan na markasehatan do songoni muse ma nian hita sabagas tinopot ni surat kon. Ayah, tarson na huatir huingot ayah di hakean ki tu pandaraman naingkani, benna menek i dope au, lomos sanga karejo aha na suman tuau. On pe hupaboa ma tu hita sude di haratak taon, bahasona au madung dapot au ma karejongku ima manggali bondar. Gadobas ninna, madabu surat i laos pangsan madabu ayah si Batu amantai si Balak. Tangis umak nia tarbayang danak tamat SD karejona manggali bondar. Dung i suopan, nga honok sadar ma mulak ayah nia, boti sip muse umak nia. "Nangkon komu marsak dabo na hiras do ia di sadun", ning ayah si Telegu na maroban surat on. Matogos ma pir do ia uida na mangaranto i, anak ta pe tarsongoni do karejo na rap dot ia, ning amantai muse laos muli ngun Simamonen i. Sunagana doba antong anggo na mangompaskon gogo, MATOGOS MA PIR, niroa ni ayah si Batu putusna.

*telah tayang di FB Maret 2013