Oleh : Darwin Nasution
Ngun bahasa Malayu don ruangku asal hata ni tual, na manjadi tuhal ato manuhal di saro jita. Tual on maknana terpotong-potong pendek-pendek. Jadi memang pala manuhal iba margotap-gotap mei tano ombik i pondok-pondok ibaen sapulu jari tangan niba na marfungsi songon pacul ato beko. Dung gotap-gotap tano i ibalikkon ma sanga adong di gotap-gotap nai lubang ni bolut ato mungkin i toru nai. Taru na muldop dei bulus get lari anggo na marisi di panuhalan nibai.
Manuhal biaso son madung idok nangkin sotik di tano saba na marpaya ato na marombik tai inda songon jia bagas. Anggo na bagas muse dontong paya nai ngana takarejohon i, nga tarangkat paya nai anso nida bolut nai sangan tujia marlojong. Angkon na nida do, anso tartangkup bolut on. Dung dapot itokokkon tu batangi i anso mate. Marlagut ma naron ira-ira 10-15 bolut na sedang marinduk tangan pade mei iantak, cukup mada i sakali mangarondang. Tinggal mambituai na domei dot piso sanga sambilu na menek. Padalan ma songoni piso sanga sambilu i ngun boltok parujung i toru ni baba nai masibak sampe tu lambung ikur nan. Pala dung boa masibak ipaiasma sude parkuas ni bitua nai ngadong na parguna i baen panganon, pala nadong pe na markajiot dompak mandonoki paling mei na marngeong i, bocek na maek. I paias sampe ulang adong manyisahon daro di bolut nai, juo dot di tangan niba. Nga dapot jau pastina sanga na mangarangsang tubu pei tambuhu ato butir di ulit niba anggo adong bokas daro ni bolut na hiang. Ning natobang-tobang i songoni mada boti.
Iasma bolut nai, ihapit mei i salean i, na ngun bulu ibaen atope ngun kawat. I dadang-dadang manyale majolo i tataring i bahan bakarna sabut nai tutung. Doces-doces mei kaluar aek dot miyak ni bolut i dung muloi hiang i pamilas api ni sabut i. Dung hiang botul, isangkotkon ma soni i labang panyangkotan ni garuntung i sarap, lek hona timbus pardahanan maia i so ulang mardan targan so i rondang.
Adong ma mungkin hatiha ni si taing manggule rondang na pakek ato liut, tinggal manyintakkonna doma ngun ginjang tataring i, i gotap-gotap lau i tuk-tukkon sotik tu panggilingan i so madayuk. Ombu-ombu tong nangkon be ita bahas, madung apil mei pit-pit pe mata sanga aha na porlu alaklai adaboru alak Mandailing malo marmasakkonna. Na paling ponting mangalengkapina paling angkon manyuruon si dalian tu topi ni bagas ni ompung raman an mangido bulung ni unte bolut. Makasudna so uskus muap ni rondang bolut on, so tabo non pala i pangan iba sabagas gule potang.
Carito nai caritohon tu daganak parpudi doma da on. Ngana dapot jiba be pastina sanga na adong dope bolut di saba-saba i di mandailing. Aha gakku sobobna, madung hadaratan ma paya-paya ato ombik di ita an harani na mamupuk buatan i doma eme. Ima ninna efekna, mambaen tano saba i padatna mangalobi i. Harana bolut nai saji on di rumah makan i pe ninna bahatan budi daya domei, na ipoliaro i tambak sanga i durum. Anggo manuhal atope marsulu bolut ampot ma liput ma ngun Mandailing. Na sannari tarjadi i lopo i, manuhal mamak mudin i igung nia inda ungada ningkalai marbolut, bustakna sajo do sangkot di jari-jari nia.
hiii hii
telah tayang di fb feb 14
0 komentar:
Posting Komentar