MANDURUNG DI BATANGGADIS
Oleh : Darwin Nasution
mandurung au mandurung
tardurung au urat ni galoga
malungun do au malungun
lek tu kuah rara i mada roha
Intermezzo dei sotik da. Inda benna get marpantun kita on mangasas carito on. Tai, hum langka pambukak dei bahasona memang mandurung i adong dalam khazanah keseharian ni alak Mandailing di huta-huta na. Sabangso manjalahi tatak juo doon, cuma na dapotna bahat situtu na mandurung on, udang do. Udang aek tawar na lumobi tabona, pala igoreng, i boyom ato i gule maruba maon warnana manjadi na rara.
Mandurung, hatiha na paling pas ima dompak horu ato magodang aek. Di malkot ni aek mai na biaso marsigantil mei udang i di duhut-duhut atope urat-urat na di topi ni aek i. Ro ma durung niba manyauk na salau i utuk mardabuan ma udang i tu durung on. Durung di Mandailing ijalin sian bonang bangunan, so tahan biasona dung siap iubar dohot gota ni singkam. Jadi kuat dot pir mada durung nibaon, payah so masuak pala sangkot. Ke mulak tu na mandurung i, manombo ra dei marcampur dapot dot gamak, aporas, siating, incor atope lonjing. Dung kurung di durung i, i pamasuk mei tu baluang sanga baul-baul nai kobekkon di ak niba. Carona, haut ato golom ma soni gulaen nai sian pusuk jambu ato pangolbungan ni durung nai, dung i paias sian asar, baru pamasuk palan, ulang sampe mangkadabu. Torus ma jojori topi ni aek i lau tu julu, utuk urat, duhut ato asar na di topi ni aek i, bakal marudang mei biaso anggo dompak magodang aek. Lek hati-hati doba, anggo na murmagodang do aek nai, iantak do, naron ra dei silat pat mangalo arus ni aek, boti ra maroban mayup iba.
Anggo di musim logo do, sonjia ma mandurung so mandapot udang? Haruar ni udang di logo biasona ilotok dei ngun julu. Jadi memang inda mungkin i di batang aek na godang. Kehe ma iba mandurung udang tu rura na menek, lotok ma dot tano liat ngun julu, nangkan kaluar mei udang nai. Anggo mandurung rura lau tu jae. Aso? Anggo urang pangalotok nai, bisa i tambaan torus. Bedana, pala udang rura tarlom-lom, anggo i batang aek an, tarcoklat. Maradu muli ma torus mandurung na sampe lalu tu muara ni rura i, biasona sampe tusi anggo baen guleon di iba sabagas, ira-ira satembokan dapot mei.
Igule siak ma natabo hasil nai durung on. Campurna buatkon masoni robung bulu parupuk di topi ni aek godang i. Lalu tu bagas mangkuhur karambirna doma, dot manggiling lasiak na, dot pasingkop bawang sira asomna. Anggo dong pamasuk ma tu bagasan parira sotik pangaroncana so mantap. Ladung ma markerer dung siap bahan nai sonjia cara marmasak ni alak kita.
Hasil akhirna tarida mei gule udang na marsigor, rara udang nai, rara muse kuah nai. On mada sada naso tarsarion i, pala madung dao iba di pandaraman. Sada uti-utian na marhasaya, na orisinil isadiohon alam, pemberian ni na Sadai. Malungun iba lek malungun, tu kuah rara udang marcampur robung bulu parupuk i, marindahan milas si pulo gari manganna. Lek tusi marpupu roha i, oidah manetek dongdong i ben sihirna.
telah tayang di FB 090613
0 komentar:
Posting Komentar