Oleh : Darwin Nasution
Ngon judul nai madung tarboto do pokok pangecek-anna sakali on sibodak. Sibodak on anggo bahasa Indonesia na na pas ruangku nangka do. Anggo cempedak bahatan malua dei pangartian ni alak kota tu sibodak bubur. Anggo sibodak bubur di itaan ma tardistribusi mei pangartian na tu KW son pandokon ni Si Mongol di acara Stand up Comedy. On sibodak ato nangka nai do, na tapal-tapal dayuk i pala i sargut.
Sapanjang Tor Sijanggut an antong na bahatan i sibodak on. Adong naisuan nampuna kobun, adong natopak i itingkon misang ato binatang na lain di harangan i. Anggo na jolo memang Tor Sijanggut on nai paringah ni alak do on marhauma, di antara-antara nai adong mon isuan sibodak, tarutung atope koje. Dung salose ato inda dong be halak na marminat marhauma muloi saira taon 1980-an, tinggal ma buah-buahan nai magodang tu ginjangan, tarmasuk ma sibodak on. Sibodak naon jenis na sedang-sedang do, tai rasa na amang oi, hampir son limon dei bahatan. Batang nai hama na gincat-gincat, songon na mangkojar mataniari nida benna i horlung-horlung i. Anggo na tubu di arangan-arangan antara kobun ni alak i, na hantam dei soni i pambuatan, ngana dong balok nai jabat, bahkan anggo paksa tu kobun ni alak anggo na tinggal do nida na lalu juo mei ibuat.
Marangkat maiba tong i tu luok Dingin-dingin goarna mangarah madao lao tu Barabolak sampe tu Aponjian di luat Tamiang, tolu opat sanga lima halak. Madung tongkon dontong beberapa tempat sibodak na tumpuk na get i tuju on. Pala nga dong di nasada pindah tu luok na lain biasona mun madao. Sakali i antong langsung do dapot di nadonok nai. Pas i panaek i jama an, adong do onom sampe pitu na malamun. Tanda de antong na lamun pala ipisat sanga ianggo dayuk mei ato muap na dung malamun. Salose tarpaijur sibodak nai iparsamo-samoon mei i toru batang nai. Pas iboa margota mei memang, iapus soni daun sibodak i juo, na markadabuan sap disi marampar. Sangajo anggo pitu sibodak opat kalak do iba mangan na, ro do songon na mangonjat, doting siubeon songon gordang sambilan na baru i patarik ulit nai. Boltok niba pe soni ma, palu-palu doma gari urang na.
Lalu mulak sampe tu uta hum na runggar dope ilala sotik boltok i. ni roa na mamproduksi dei torus gas ni sibodak i, ima so payahna so tonga. Tarincogot ni ari dope, dung taroban modom so mela ilala butong ni ga nai, i pe ba saborngin i madung adong mei sora-sora ilala ngun pudi. Bum-bam saborngini mariam bambu ngun muaro nai, gogo-gogo muse. Tarsonggot bage jabat anggi i si utek i baenna. Tarkaua i tong, halilian ni daganak mon di Mandailing, pabulus haporluan ni badan satontang gizi ni buah-buahan. Anggo nangkan manabusi ngadong hepeng, adong manombo hepeng buah tabusanna inda dong hatiha i. Ninna hubege lek adong dope sibodak riar i di Tor Sijanggut, tai inda pasti jau sanga marsibodak dope daganak di sadun? Adong dope na marsibodak Japangibulan? Indape i alusi ia, saima jolo carito, mintop palito, bornginan mabo, marlanggum modom majolo ...
telah tayang di FB Des 13
0 komentar:
Posting Komentar