R A J U D*

 R A J U D

Oleh : Darwin

Sakali mambege gorar ni jolma on, inda na menjelma on ba, songon gorar na ngun IPB binege teleh. Wuss, IPB muse, Institut Pertanian Bogor do, inda ba, bopele tarmasuk petani potar na sukses don amanta Rajud on di sada Tor ato bukit di Tamiang.

Ahado IPB nai nangkinan, maksudna India Pakistan Bangladesh do ato tano Hindustan. Adong mei modelna binege Rajud Singh, Rajud Khan, Rajud Kapoor, atope Rajud Nehru. Tapi inda juo alak adun amantaon, jeges-jeges nian ngun adun filim, urang rokom do ibanaon jadi bintang filim, bope gorar tarsongon na hombar dot Hema Malini ipio. Bisa juo nian mungkin dapot peran amanta on mungkin anggo di sadun, jadi polisi India namarsaraor pontong i, na martugas mangkojar-kojar parjudi, ato manyirang umak-umak India na marbada marsiranggutan obuk.

Nangkin hudokon petani na sukses do amanta Rajud di Indonesia on, ima di sada Tor ato gunung, Tor Simulakanjing goarna. Ben sangkal ni tangkokna, sampe anjing pe ra mulak inda tuk sa. Rajud on sampe do torus imana tu sadun mararti stamina na mangalobi i anjing. Martaon-taon amanta on marulang tu si so bage markurang tenaga dot kecepatan na mangalangkai Tor Simulakanjing i. Demi manyukseskon tani potar on.

Potar on ngana bahaton jabat, sabatang don. Namun, hasilna marton sakali panen. Dangka parbatuan ni potar on, amangoi, timur tenggara selatan barat daya. Marratus jojar sandangka. I palua pe sugari sude bodat tu potar ni amanta Rajud on, sa tor i, nga kan habisna go lumpak marbatu.

Jadi ima paringah on ni amantaon muloi sian bungo sampe danon na. Manjago sian musuna, ulang sampe ilala namora dangka hum bungo ato pudung dope. Manembaki kotok, simpe, ato bodat naro tu si, bope ale na palis sajodo bidikan ni udak Rajud.

Di na panen, manompi manjujung doma alak i ro ngun potar an. Mangaldung, mangkindit atope mangadangankon. Tapi au inda ungada u survey sanga sajia angka na pasti hasil ni potar on sakali marbatu.

Piga juta dei dapot udak Rajud sakali turun ??

Bogor 12/08/20

*telah tayang di Facebook 12 Agustus 2020