MARKATIMBUNG*

 Oleh : Darwin Nasution

"Keta ridi Bosah"

"Jia"

"Lombang"

"Keta ridi Mail"

"Jia"

"Rabak"

Imada ecekna hata-hata na kaluar mangontang maridi marlubuk dompak menek iba najolo. Dompak doras, hibul boti godang dope aek ni Batanggadis i. Inda nangkan na bisa dot marlubuk anggo naso bisa dope marlange arani godang ni aek i. Naso bisa marsiajar majolo i topi di nababok-babok i. Lange-lange touk jolo songoni marsiajar manimbang badan. Dung lancarma, madung malo bage manyiuk markonong, baruma masuk tu lubuk mangalumpat ngun saba sanga ngun karak i.

Ontang-ontang naparjolo nangkinani tu si Bosah, maridi tu Lombang maksudna tu lombang ni banjar Siluak Tamiang. Adong karak na bolak disi panganjakan mangalumpat tu lubuk na godang di toru nai. Bagasna mangabisi, bonom sapanjang kalak. Ima so butuh sinaloan marlange songon gulaen. Na madung malo i na mangalumpat, marlange  sajo doma marula-ulak karejo nalai na maridi i sampe marjom-jom doma. Pala dung mantak na rata doma bibir i.

Lubuk lombang on ma na manjadi madarasah na godang untuk pelajaran berenang. Nangkon jabat songon daganak di kota kon marbulan mambayar tiket kolam renag so malo marlange. Lumpat ma songoni tu aek na sedang-sedang nai jolo marsiajar tarditopi, muli-muli malo ma ho i. Dung lagak bisa ma mangalo doras ni lubuk lombang di topi napal i, baru hantam salto bagen ngun karak i, marlange, markonong, atope lau mandehe mangkojar-kojar gulaen. Halaka sa banjar Siluak i tola idokon malo-malo di lubuk on mei marlange sampe saekstrimna magodang pe aek marlange dope alai sampe tu bariba, harani i bariba saba ni alai.

Lubuk pangontangan maridi na paduana tong ima lubuk rabak nai papondok dei, maksudna lubuk Saba Garabak dei, itopi saba ni alak si Mail dot si Cewa. Lubuk di toru ni gala-gala dei najolo, mangalumpatna pe ngun gala-gala i dei i hantam. Dung i lumpat tu lubuk nai, marlange mei mandarat sampe tu bariba tu galoga-galoga i. On biasona maridi di tonga ni ari sampe potang maia dison on. Harana tardao sotik ngun banjar i. Anggo di lubuk lombang antong sampe magorit pe nadong dope i daganak na markatimbung, ben donokna.

Cuma pala ipikir-pikir sannari songon pepatah i do daganak na maridi i di itaan. Jarang dei na marsabun, oni jarang dei na mangusa dahi nia. Hum olat na mardiri marmaekkon badan maia di lubuk. pepatah jia male dongan, "lalat-lalat markatimbung lupa mangusa"

*telah tayang di FB Mei 2014