LOMPONG dot LOPO*

 Oleh : Darwin Nasution

Aha ma na suman ale parumpamoan pala madung didokon lompong. Nga telehe na parumpamoan, sanyatona do bahasona lompong ato bahasa polisina ratohon ma songoni "kelelawar", ima binatang na kaluar borngin. Madung sunnatullah nia dei kaluar laos borngin ari i--isi dope so marfungsi mata nia na cirning manyirlak i--manjalahi buah-buahan ato batu ni hayu na manis ambaen panganon. Jambu, jambu orsik, jambu aek atope jambu erang na pasan ilala ia i hanyalon. Pala i arangan nga marnaon be disia batu ni pege-pege atope ruham na lamun. Marmoncak ma halai i dangka tu dangka pala adong suan-suanan na marrupo buah-buahan on dompak malamun. Parsarguton nalai mei sampe butong marrombongan muloi do masuk borngin sampe masuk marayak torang ari. Laos torang ari i baru ma mulak kalai mulak marsigantung tu podoman nia nabiaso, ima di hayu-hayu na rimbun na targolap-golap. Incogot golap mulak ari baru kehe muse tu buah-buah parngayatan na tuari an, pala nga tagik be disi buah nai, umpamo hurang lamun sanga abisma baru pindah tu batang lain na ijalahan muse. Aso do ihubungkon baya nangkin dot lopo, aha makasud ni i?

Lopo antong pado adatna marbuka dei sasadari. Angke parminum kopi an do sanga tes i tambul kotan sanga roti pisang. Marbuka dei muloi torang ni ari sampe borngin, adong juo nian sampe get torang muse doma mulak ari cogot nai. Anggo manyogot biasona kotan mei tong dot goreng pisang panganon favoritna, arian dot borngin goreng pisang sajo jarang dei markotan. Tambana tong roti pisang nangknani ma, karak-karak, kue katawak sanga pe kue sagun. Na baku mei ninna di lopo-lopo songoni di Mandailing, marsorin non sotik pala arian dot indomie pake telor ato pira.

Pala borngin aha muse langa ruai. Lek tu na siak-siak dobai kehena tarsongon na mangalo ngali ni ari i. Adong na mangido indomie, adong mie lidi goreng siak muse, atope adong juo na manyadihon aek tape pamilas suping. Olat ni panganon on ngana marngayat nian jabat da Jabingkas sanga Jamuldus sasaborngin i di lopo i. Ahado na mambaen alai sangkot disi. Adong disi parmainan dobol ato dam tanduk na dopang-dopang itamparkon tu meja i, marcatur atope marleng. Na riburan i pala adong santing na marganjal, mate balak onom atope dua kapetor sanga dua ulu ning Jabingkas. Martaha-taha mei kecek disi sasaborngin, pupu mardam ato marleng marsiarsakan lau singnggang ato martaru sotik-sotik epeng sanga indomi pira inumonna sustel. Margonti main, margonti maradian, pupu paido panganon sampe marayak torang ari. Itinggalkon kalai mei deba lopo i mambayari pe suada, na marutang do baya. Madung i relahon nampuna panganon manyadiohon panganon i ale, ampe na manganduk muse do. Ampot ngana bayaron nia muse i sampe sadia honok, ampot na pindah lopo muse ma ia nga tagik be mabiar i tagih utang.

Tarsarupodo waktu ni lompong i kaluar manjalahi panganon pabutong boltok i, dot parkaluar ni alak na manjagoi lopo i sasaborngin, pas do lau golap ari sampe get marayak torang ni ari. Mangondaskon mangisi bitua juo dei dua-duana. Anggo tagik dope persediaan ni buah i di batang na sada lek ro dope i lompong i tusi incogot nai. Marngayat bayo sanga jolma di lopo i anggo lek tagik dope menu na tersaji disi dot parmainan pandukung nai, oni jeges dope stok ni dompet nia manggararina. Anggo adong ma naso tagik manggonti lopo mei kajakna, sampe tu lopo nai huta lambung. Manggonti batang mei lompong i anggo nga sep be persediaan ni jambu na lamu di batang saonok naon pindang tu batang na asing. Tapi secara umum sarupo do lompong dot halak na kaluar marayak borngin i dot lompong, mulak laos torang ni ari modom mei di hayu pala lompong, modom di kamar na golap inda sibuka tingkap pala jolma, su ulang momo tarsonggot. Sapala tarsonggot na potang ni ari muse doma so kaluar mulak. Pas lompong.

Na santak mada mula sarupo halak dot lompong tile. Sabotulna ngana da sarupo bagian kodrat ni i. Lompong antong son naidok parjolo nangkin madung sunnatullah dei kaluar nia borngin harani panca indera panjalahi panganon nia i borngin do marfungsi. Halak pe marfungsi tubuh nai bekerja keras na sehat sabotulna arian dei, borngin kodratna istirahat do ato maradian. Barang ise sajo na manukar kodrat i kaluar manjalahi hasonangan marrupo panganon ato na asing borngin ni ari saat ia i parentahkon Tuhan tai istirahat, boh nasarupo domei dot binatang, na sarupo domei sanyatona dot lompong.

*telah tayang di FB, Maret 2014