Oleh: Darwin Nasution
Lokasina di Tamiang Kotanopan, langsung do ita toho tukang nai ima Dinasti ni amang boru i Maholuk Lubis. Bagas partukangan ni piso takik na on sejarah asal mulona najolo antara sabagas ngun pasar Tamiang persisna SD 2 Tamiang di tano na tobing mangintir, i antara nai ima bagas ni angkang i Ja Bauran. Ison mulo ni na mambaen piso takik na utamo, tai nga um i sajo mamaben goluk ato gadubang juo, sinapang jojal, mambaen atope manyervis sinapang angin na marmerek. Anggo sinapang angin buatan ni alai i polos dei ngadong merekna. Hebat luar biasa, bisa mambaen sinapang na mamorluhon padomu bosi tu bosi ato kuningan tanpa alat las. Tambana adong do on sudaro ni amanta Maholuk on na mambuka produksi piso takik dll muse di lambung nalai i juo ima Daruis dohot di Pasaman ima Gandong, tepatna di Kotanopan Rao.
Mulak tu dinasti piso takik nangkinani, balakangan manurun ma mambaen piso takik on tu anak-anakna ima na margoar Husnan, Tan Tembang, Omang dot Padati. Sude marproduksi di humaliang ni pasar Tamiang juo martaon-taon. Jadima pasar Tamiang i manjadi tempat pemasaran ni produksi nalai i deba, deba nai tu Sumbar, Pakanbaru, Medan bahkan sampe tu Jambi. Husnan najolo partukanganna pas di topi pasar i, Omang pe nga dao ngun pasar i, Padati manoruskon i bagas pusako keluarga dung maninggal amang boru i. Tan Tembang balakangan mambuka usaho na songoni juo di Sigalangan Tapsel.
Sannari on, Omang dot Padati madung pindah tu bagas na sandiri di lambung sikola julu ato SD 1 Tamiang, bagas parjulu ngun banjar pasar, idok kalak hatia on Banjar Ujung Goluk. Mungkin benna pindah i ma halai tukang goluk, goar di samping tukang piso takik. Najolo goarna tu pamutaran an, maksudna inganan ni motor na godang mamutar kapalo arana adong tano na bolak disi na marsambung tu dalan i. Banjar Ujung Goluk doma na mohot di Tamiang anso itandai alak. Husnan pewaris tertua dari kerajinan pande bosi piso takik on madung pindah tu banjar parujung kelurahan Tamiang ima tu Siluak, di topi ni Batanggadis i. Anggo anggi nai posisina di km 7 ngun Kotanopan, banjar Siluak on di km 8.
Ning si panakik ato pangguris, na alusna buatan ni piso takik on buatan ni bang Omang. Bahatan na borongan parjagal dome na ro tu partukangan nia i baen gadison tu pasar-pasar saumpamo pasar Pakantan, Muarasipongi, Laru, Maga, Hutagodang, Kotanopan atope Panyabungan. Hum alus dot ummalo ninna hubege ibana mamili bahan per ni motor baen piso takik on. Ato mungkin teknis modifikasi nai hum malo ngun sudaro-sudaro nai.
Tu hagunaanna sotik carito, piso takik on ma alat panen ni gota na marfungsi mambaen garis ato jalur, strip ato polan bahasa Mandailing. Spesifikasina seantero halai tukang i on ma:
- Mata Piso dari Besi per semi baja
- Gagang Piso sian hayu ulit manis
- Panjang Piso 23-29 cm
- Panjang Gagang 22 cm
- Lebar Piso 2,5-3 cm
- Lengkung Mata Piso 60°
- Tebal Mata Piso ± 2 - 3 mm
Mambaenna mangalewati proses manggotap, manokok, mambontuk, mangihir, padomu dot gagang, paaluskon, dot monyopu (mambaen sifat tajom). Dung i na siap mei igadis. Dung i tabusan umpamo igarut kasar mei jolo sampe manipis, baru igarut alus so tajom. Ioban mei dung i itakikkon tu gurison an. Mur maonok mur majeges dei tajom nai pula ro ma maos nai. Anggo ning si amat buras bisa parcukur baen tajom na. Madung marumur ma lai sude partukang on adong muse do huida nian beberapa nai kader nalai patorus usaho pusako on. Ulang gari songon parudon tano kudong-kudong i, lipung ngadong panggontina. Sotik catatan, sada halak pe inda dong on tukang on na malo mangguris, teknik mambaen na do na binoto ni alai, anggo teknik mangguris so paten ngana adong baya i jabat. Sai ma jolo caritona, ape angkang Padati tokok muse piso takik pesanan ni alak Rokan i ...
0 komentar:
Posting Komentar