Oleh : Darwin Nasution
Sasabagian halak na magodang di Mandailing Natal, Tapanuli Selatan, Padang Lawas, Padang Bolak atope Sipirok, rado bahat ingotonna, dompak menek ibana i kampung. Pala manyogot antong kehema tu sikola umum, sikola Arob ato ibtida’i satontang mangaji pala potang. Salain hatia namarsiajar on marmayam mantong, lao-lao atope main uti-utian. Adong mei namarlayang-layang, marberencis, martukak ato marasab, margala panjang, marrene-rene, martembak koje, markaleren, marporang-porang di durame, marpangka batu koje,martembak-tembak na ngun bulu dot bahat dope na asing ayam-ayamna. Pala dompak tempo sikola adong ma na kehe tu arangan marpikek cion, tu padang-padang marpikek leto atope tu topi aek marpikek sanga manjorat ruak-ruak bangke. Harana bisa do marpikek on ikarejohon daganak, inda halak na dung godang ato dewasa sajo nabisa.
Marpikek on marmaksud mandapotkon amporik ngolu-ngolu mamake cangkah ato jobak pikek. Pikat do dabo ruangku asal kata nion. Aha do na mambaen amporik na riar on tarpikat masuk tu cangkah pikek i?Adong dua, na parjolo na paling ponting ima parpikek nai. Aha do parpikek on,ima burung ma madung mau, na madung ra mangaluarkon sora nia mamio-mio amporikna riar i dope, so ro tu cangkah pikek on. Na paduana, ima ompan na sep nabiaso i pangan ato iincop amporik ne get pikek on on. Umpamo, ibaen ma icangkah pikekna margairan na martutup pala terdege amporik na riar i silantean na i bagasan, i sangkotkonma disi bungo ni jambu na rara. Tarpikat masuk ma tu bagasan baen rarana, tabo muse nian harana madung biaso i pangan sanga iincopi alai tarida i arangan i.
Cangkah pikek on nabiaso adong tolu kamar, ujung nai dua-duana ima kamar panjobak ni amporik na giot di pikek i. Parpikek pamionai ma i hurung di tonga-tonga. Biasona parpikek on boru-boru don jenis kelaminna, so marroan jenis jantan pala mangkuling ia di arangan an. Harana i musedontong memang tujuan, umpamo marpikek burung rata-rata um godang dao dei argana pado boru-boru. Jadi boru-boru on tugas na bahatan jadi parpikek. Mulaktu carito cangkah pikek nai, songon nai dokon di ginjang adong gairanna. Aha mantong idokon hata so momo mangarti gairan on tie. Na manggorakkon so lancar otomatis ma soni. Artina, dung hona ato malua gairan nai martutup otomatis mapintu i, tarkurung ma amporik na get pikek on i di kamar cangkah pikek nai. Adong dua kamarna, ra doi memang marisi duana, pala na tarpikat tu sora ni parpikek i dua sanga lobi amporik nai, Tapi na dapot biasona paling bahat dua.Pala itamba doma dohot pulut di sangkuliang nai, tai jarang do on anggo tu burung na godang, harana ra horuk parjolo pala adong na hona pulut targan sohona pikek. Jadi mabiar ma na lain ro tu cangkah pikek i.
Marpikek cion jegang ma namomona. Cion jegang na madung jinak dot mau, ioban ma tu bahal nai. Taon ma soni di sada hayu mamake para-para. Binaen ma di cangkah i bungo ni jambu jambak na rara i ompanna umbahat. Jadi nga hum na tarpikat tu sora sajo na riar i, dung tolap tusi adongmuse dope idana incopon. Memang ra dua tolu jolo masuk baru tardege gairan nai. Tai pala sada dope masuk madung mandege gairan, alamat na sadai maia dapot. Songoni muse ma mungkin i kamar na sada nai. Dua ma na dapot, padohalromabongan ni cion jegang on marpulu ato ra marratus sa uduran. Songon na otikilala tukang pikek i, pala na dapot dua maia. Baen i ma, anggo marpikek cion jegang madung joleh mei marcampur dot pulut na i taon di humaliang ni cangkahpikek on. Jadi ikobekkon juo ma ompan bungo jambu on di kuliling ni cangkah i,i dangka-dangka ni hayu panaonan nai. Um bahat doma nabiaso dapot sian na ona pulut. Tu pangartian sotik, aha do ruai pulut on. Ima, sabangso gota—na paling deges gota ni torop, icampur sotik dot gota ni koje so malokot—na i tangging nipis soni sasapulu centi di lambung ni ompan nai. Tardege, lokot mei pat ni amporik i, inda but be habang, tinggal mambuat domei.
Anggo iba tukang pikek nai i pamanat-manat meingun toru-toru ni hayu panaonan nai sanga adong do masuk cangkah, ato ona pulut cion jegang on. Na asik mada pala adong na masuk oni bahat muse na hona pulut. Dung horuk dot tarancam ma ilala uduran i, arani bahat na ona pulut dot adong na hurung, dongan-dongan nai morot mabang mei sian i mabiar. Indabe, olat ni imaia i. Panaek ma hayu panaonan i, buatma parjolo na ona pulut i, i paias pat nai. Na madung ias i padomu tu kamar ni donganna na ona pikek i. Ra dei sapulu sanga dua pulu jumalah na na dapot i sude na. Isi ma tagi nai.
Anggo tu amporik na godang-godang inda biaso main pulut. Asli do cangkah pikek dot parpikek na maia. Biasona marpikek rata-rata doon, ato gunggung kapas, pande garigit, kico-kico arangan atope korok-korok najolo dompak adong dope di arangan i. Marsimonjap mei nampuna cangkah i dirumbun-rumbun i mangaligina, polngit. Marbolnang-bolnang mei mata iberbinar-binar pala dong ma naro tu cangkah i, mangkeker-keker parpikek nai. Alamat na dong mon na dapot, mungkin ni roana di bagasan. Adong bage dei nasaban-sabanon...adope...adope.. masuk...masuk...masuk, ninna mubit-ubit di papangan nai baen semangat na mangaligi laos masuk amporik na riar i. Sonang jana marbungo-bungo doma ilala ia ate-ate i dung adong na hona pikek, hurung di cangkah i. Isi ma mungkin candu nai, ima so adong alak na get marpikek sajo di kampung-kampung di Mandailing Godang an sasapanjang.
0 komentar:
Posting Komentar