MANISAN NI BON-BON*

 Oleh : Darwin Nasution

Manisan muloi ngun narobi tardok mon ni roangku panganon nagok hasaya dot gisina nai hasilkon ni loba atope bon-bon. Anggo mambuat manisan ni loba tong mamorluon sinaloan na tarlobi, harana na ra dei mangalo loba nai pala ikaru manisan nai sarang nia i. Sakali on panjalajahan nai manjalahi manisan na um momo do, manisan ni bon-bon. Bon-bon inda sabangso loba on marsongit, ngana mandoit on, binatangna menek hum menek dope pado dal-dal. Bon-bon mambaen sarang di ruang-ruang ni hayu, di ruang-ruang ni beton atope di bagasan ruas ni bulu. Na di bagasan ni ruas ni bulu mon jalahan on. Mandapot kasampatan ma iba najolo mangikuri halak na godang-godang ima bang Raman dot Cicit mangarangai rumpun-rumpun ni bulu ampot adong do disi sarang ni bon-bon on.

Tujuan nami waktu ima harangan di dolok sikola SD Inpres Tamiang, harangan tor Dingin-dingin gorarna malua tu lombang ato lembah Taguru sidungna tu Jambatan Silatung. Manangkok ma mangiutkon halai nadua mangalewati harangan na samok marrintop ni hisik, mangalangkai duhut pambugangi ima ria-ria manombo, so sampe tu sada rumpun bulu na binoto ni alai dodas marmanisan bon-bon. Sampe i rumpun ni bulu i i paligi-ligi ma di tungko ni bulu bokas panggotapan sanga adong habang-kabang bon-bon. Adong mada tarida, i jalahan ma sanga ijia lubang na. Dung marsuo, itaba ma tungko ni bulu on dot galuk godang palan-palan so ulang ninna sar-sar nganan ni manisan na di bagasan ni ruas ni bulu nai . Tarlobong bang Raman ma batang nai, geleran ni bang Cicit ma mamboa ruas ni bulu on ampot marmanisan do. Itokok dei carana goluk on dohot panggotapan ni hayu naibul. Pala sidung boa, tarida ma madu nai himpal-himpal dua tumpuk sabolak opat jari. Rupo pas do haroro nami i, manisan dope na dapot i, ngape ning abang-abang nadua on maruba jadi anakna. Memang ninna disi juo dei marpira dot manotas bon-bon on, madu i mei panganon ni anaknai targan su magodang. Sap mei soni isi dot kotoran nai, ima so maruba warnana manjadi gorcing. Na dapot kami on bontar kontal dope songon warna ni aek. Ima keistimewaan ni manisan bon-bon on ningkalai, ias dot bontar.

I paimbar ma manisan on tu palastik na bontar, ikobek ujung nai su ulang sampak. Rap juguk ma hami di rumpun bulu i juo, rupa na disi juo dei nangkan inumon. Dung i lubangan menek sui-sui ni palastik nai, na margonti malai mangincop manisan nai, baru pangabisan na jau. Salose i inum nai lanjut kon muse tu rumpun bulu na lain di Taguru nangkinani, di topi takik on ni Jabanggar.

I sigat muse harangan naso dong dalan-dalan nai, tarsarupo dot na parjolo, mangilakkon hayu sanga runja-runja atope duhut na marrintop. Manombo na main juo dei goluk rambehna mambaen dalan so momo sampe tu batang ni bulu i. Lalu tu si, marsuo juo do binatang nai marabang-kabang, adong bage na songgop tu obuk niba. Hatia tarjalahan ma tungko ni bulu, dot madung tarboa ruas nai, rupo manisan madung lewat, madung get manjadi anakna. Rupona pe maragak lau gorcing. Pala dapot ma na songoni, ikobek mei mulak bulu nai solek ibul, baru i pajong-jong soni isi, ampot giot dope alai ji anak ni alai i. Inda mandapot bage aha disi, pado landang hami buat ma tungko ni bulu na paling godang. Ginjangna tolu ruas, ira-ira tartonga dua meter, nangkan baenon mariam bambu ayam-ayam ni daganak i uta. Nga mangincop manisan sakali i, maragak muli doma maroban tangkal ni mariam, su bum-bam non i kampung ira-ira porang Iran-Irak ning daganak i, si Caen, si Cuam atope si Capeng.

*telah tayang di FB Jan 2014